Májilis depýtaty Qazybek Isa Qazaq uni-ne bergen suhbatynda sailaýǵa qatysty bylyqtyń betin ashyp, Qazaqstan munaidan tamshydai ǵana paida kórip otyrǵanyn málimdedi, - dep habarlaidy Dalanews.kz.
Depýtat áli kúnge deiin sailaýda kúmándi nárse kóp ekenin jetkizdi.
"2023 jyly qańtar aiynda sailaý zańyna ózgerister engizý týraly depýtattyq saýal jasadym. Sol kezde depýtattyq saýalym tarap ketti. 2007 jyly sailaýǵa ózim qatystym. Ol - partiialyq tizimmen túsetin Parlament sailaýyna úshinshi sailaýymyz. Eshqandai partiiany túsirgen joq, tek "Nur Otandy" ǵana túsirdi. 2023 jyly depýtattyq saýal jasaǵan kezde osyny aittym. "Nur Otanǵa" 90 paiyz daýys berdi degenge kim senedi?" dedim. Nur Otannyń ózi de oǵan senbeidi. Óitkeni 2007 jylǵy sailaý kezinde ózim basynda boldym. Shardarada júrdim. Seniń kózińshe sailaý komissiiasynyń qyzmetkerleri Aqjoldyń daýsyn ózgertip jatady. On ese kishireitip.
2007 jyly "Elbasyǵa eldiń senimi bitken sailaý" degen maqala jazdym. 2007 jyl - elbasy qaharly, qylyshynan qan tamyp turǵan kez. 24 tamyzda shyqty. Onyń ishinde "41 qiianat degen" sóz bar. Qiianat ne? Aqjolǵa bólingen 70 paiyz daýys qaida, nege jalǵyz Nur Otan ótti? "Parlamentte daýys berý osyndai bolsa, munyń aldynda ótken Prezident sailaýyna da eldiń kúmáni kóp qoi. Qazirgi prezidentimiz kimniń ornynda otyr" degen sóz bar, jańaǵy 41-diń ishinde", - deidi ol.
Sonymen qatar, depýtat "qazaq qashan óz munaiynan paida kóredi?" degen suraqqa jaýap berdi.
"2013 jyly shetke ketken aqshany qaitarý kerek" dep Májilis depýtaty, Aqjol partiiasynyń tóraǵasy Azat Perýashevpen birge Shveitsariiaǵa barǵanbyz. Munaiǵa keleiik. Munai máselesin de talaidan beri aityp kele jatyrmyz. Munaiǵa bailanysty ónimdi birlesip bólisý degen kelisimshart bar. Osyndai kelisimshartty damyǵan elder jasamaidy. Biz de ony qazir toqtatqanbyz. Biraq 1994 jyly, 1997 jyly osyndai zań qabyldap, búkil munaiymyz, gazymyz sol kelisimshartpen áli kele jatyr. Investor keledi shetelden, oǵan eshqandai ziian timeidi.
Tabysty bóliskende, mysaly, Qashaǵannan bizge tamshy tiip otyr. Bizge tietini eki-aq paiyz eken. Sonda munaidyń muhitynan tamshy alyp otyrmyz", - deidi Qazybek Isa.
