Májilistegi Úkimet saǵaty barysynda depýtat Jambyl Ahmetbekov Qorǵanys jáne aeroǵarysh ónerkásibi mınıstrligi ókiline saýal qoıǵan bolatyn.
Óz kezeginde Aeroǵarysh komıteti tóraǵasy orynbasarynyń mindetin atqarýshysy Baýbek Oralmaǵambetov suraǵyna hat túrinde jaýap berý usynysyn aıtty.
– Men Aeroǵarysh komıteti ókilimin. Sondyqtan da depýtattyń bergen saýalyna mınıstrlik atynan hat túrinde jaýap berýge nıettimiz, – dedi B. Oralmaǵambetov.
Osy oraıda Májilisi tóraǵasynyń orynbasary Gúlmıra Isımbaeva atalǵan mınıstrlik ókilderine eskertýin aıtty.
– Úkimet saǵatyna quzyretti ókil ǵana shaqyrylýy tıisti edi. Siz búgingi taqyryptyń mamany emespin, saýal quzyretińizge kirmeıtinin aıttyńyz, solaı ma? Sondyqtan Baýbek Jetkergenuly, sizdiń ýaqytyńyzdy almaıyq. Bul jerde 2-3 saǵat Parlamentte otyryp ketý maqsat emes. Bizge mundaı taqyryp boıynsha múddeli, suraqtarǵa jaýap bere alatyn, pikir aıta alatyn mamandar qajet. Al siz negizgi jumysyńyzben aınalysa berińiz, – dedi Gúlmıra Isımbaeva Aeroǵarysh komıteti ókiline qarata aıtqan sózinde.
