Májilis depýtaty Nurgúl Taý balalardyń jazǵy demalysyn uiymdastyrý men lagerlerdiń qaýipsizdigine qatysty máselelerdi kóterip, Premer-Ministrdiń orynbasary Aida Balaevanyń atyna depýtattyq saýal joldady, dep habarlaidy Dalanews.kz.
Depýtattyń aitýynsha, balalar lagerleri máselesi jyl saiyn tek jaz mezgilinde kóterilip, maýsym aiaqtalǵan soń nazardan tys qalyp keledi.
«Elimizde jyl saiyn tek jaz ailarynda kóterilip, maýsym aiaqtalǵan soń qaita umyt qalatyn ózekti másele bar. Ol balalardyń jazǵy demalysyn uiymdastyrý jáne balalar lagerleriniń qaýipsizdigi men qyzmet sapasyn memlekettik deńgeide júieleý», – dep atap ótti Nurgúl Taý.
Onyń málimetinshe, 2025 jyly respýblikada jyl boiy jumys isteitin 17 saýyqtyrý ortalyǵy ǵana bolǵan, al táýelsizdiktiń alǵashqy jyldarynda elde 500-ge jýyq balalar lageri jumys istegen. Qazirgi tańda lagerler sany 2,5 esege azaiyp, balalardyń basym bóligi bul qyzmetpen qamtylmai otyr.
Depýtat jekemenshik lagerler sany artqanymen, olardyń qyzmeti júieli túrde rettelmei otyrǵanyn aitty. Onyń sózinshe, salany litsenziialaý men baqylaýdyń álsizdigi sapasyz ári qaýipti lagerlerdiń paida bolýyna jol ashyp otyr.
Saýalda sońǵy jyldary tirkelgen birqatar daýly oqiǵalar da keltirilgen. Atap aitqanda, 2023 jyly Almatyda balalardyń «saýna» ornynda ashylǵan lagerge jiberilýi qoǵamda úlken rezonans týdyrǵan. Al Shymkenttegi «Úsh bulaq» lagerinde belgilengen normadan asyryp bala qabyldaý faktisi anyqtalǵan.
Tótenshe jaǵdailar ministrliginiń deregine súiengen depýtat 2024 jyly 157 lager obektisinde 1 237 órt qaýipsizdigi buzýshylyǵy anyqtalǵanyn, al 64 nysannyń talapqa sai emes jaǵdaida jumys istegenin atap ótti.
Nurgúl Taýdyń aitýynsha, bul jaǵdailar jekemenshik balalar lagerlerin litsenziialaý júiesiniń bolmaýy memlekettik saiasattaǵy eleýli olqylyq ekenin kórsetedi. Aita keteiik, litsenziialaý 2025 jyldan engizilýi tiis bolǵan, alaida bul talap keiin 2026 jylǵa shegerilgen.
Osyǵan bailanysty depýtat Úkimetke birqatar naqty usynys joldady. Ol balalar lagerlerin litsenziialaýdy keiinge qaldyrmai, 2026 jyldyń jazyna deiin tolyq engizýdi, memlekettik úilestirý mehanizmin qaita jandandyrýdy jáne balalar lagerleri úshin jeke ekonomikalyq qyzmet túri kodyn (OKED) bekitýdi usyndy.
Sondai-aq jekemenshik lagerlerge memlekettik qoldaý kórsetý qajettigin aitty.
«Balalar lageri – jai ǵana maýsymdyq qyzmet emes, bul – balanyń densaýlyǵy, qaýipsizdigi jáne quqyqtarynyń saqtalý máselesi», – dep túiindedi depýtat.
