Depýtattar Qaraǵandyda jedel-járdem júrgizýshisin soqqyǵa jyqqan er adamdy jazaǵa tartý máselesin kóterdi, dep habarlaidy Dalanews.kz.
Májilistegi “Amanat” fraktsiiasynyń tóraǵasy Elnur Beisenbaev Úkimetke saýal joldap, júrgizýshini soqqyǵa jyqqan Nurbolat Dákebaevtyń áreketi qylmys qana emes, zań men tártipke ashyq qarsylyq ekenin atap ótti.
“Ózin beinetaspaǵa túsirip jatqanyn bilip tursa da, eshqandai aiylyn jimai judyryq siltep, qyzmettegi adamdy qanǵa bóktirýi – ábden shekten shyqqandyq, naǵyz qanypezerlik.Bir jasar sábige kómekke kelgen meditsina qyzmetkerlerin, ashyqtan-ashyq, kýágerlerdiń kózinshe uryp-soǵý ne degen sumdyq?” - deidi depýtat.
Osy tusta Beisenbaev bir aptadan beri izdeýde júrgen quqyqbuzýshyny tez arada qolǵa túsirý qajet ekenin jetkizdi.
“Nurbolat Dákebaevty ustaǵan soń sotyn ashyq júrgizip, qatań jaza taǵaiyndaý jáne onyń barysy men qorytyndysy týraly buqaralyq aqparat quraldary arqyly halyqty túgel habardar etý qajet” - deidi depýtat.
Sonymen qatar ol sońǵy ýaqytta adamnyń jeke basy men ómirine qaýip tóndiretin qylmystardyń kóbeiip ketkenin de eske saldy. Depýtattyń aitýynsha, kez kelgen qylmysqa qoǵamdy múldem tózbeýshilik mádenietin jappai qalyptastyrý qajet.
Eske sala keteiik, birneshe kún buryn Qaraǵandy turǵyny jedel járdem júrgizýshisin uryp-soqqan bolatyn. Nátijesinde júrgizýshinyń murny men qabyrǵasy synyp, kózi kórmei qalǵan. Politseiler quqyqbuzýshynyń kim ekenin anyqtady. Qazirgi tańda buzaqyny ustaý jumystary júrgizilip jatyr.
