Májilis depýtaty Jigýli Dairabaev "Aýyl" partiiasyndaǵy qyzmetinen ne úshin ketkenin túsindirdi, dep habarlaidy Dalanews.kz.
"Partiiaǵa jastar kelip jatyr. Ol depýtattyq saýalymmen bailanysty emes", dep qysqa qaiyrdy Dairabaev.
27 aqpanda ótken «Aýyl» partiiasy saiasi keńesi tóralqasynyń otyrysynda Jigýli Dairabaev partiia tóraǵasynyń orynbasary qyzmetinen bosatyldy. Bul týraly partiianyń baspasóz qyzmeti jetkizdi.
Dairabaev 2023 jyldan beri VIII shaqyrylǵan QR Parlamenti Májilisiniń depýtaty qyzmetin atqaryp keledi. Ol Qazaq aýylsharýashylyǵy institýtynda bilim alyp, ǵalym-agronom mamandyǵyn meńgergen.
Ár jyldary túrli laýazymdarda qyzmet etken:
- 2015-2019 jyldary – «Qazaqstan fermerler odaǵy» QB-nyń Jambyl oblystyq filialynyń tóraǵasy;
- 2019 jyldyń jeltoqsanynan bastap «Qazaqstan fermerler odaǵy» QB prezidenti;
- 2020 jyldyń maýsymynan Qazaqstan fermerleri qaýymdastyǵynyń basqarma tóraǵasy;
- 2022 jyldyń maýsymynan «Atameken» QR Kásipkerler palatasy Agroónerkásiptik kesheni komitetiniń tóraǵasy;
- 2022 jyldyń jeltoqsanynda «Aýyl» HDP tóraǵasynyń orynbasary bolyp sailanǵan;
- 2021 jyly Jer reformasy jónindegi respýblikalyq komissiia tóraǵasynyń orynbasary boldy.
Jigýli Dairabaevtyń jalpy eńbek ótili 52 jyldan asady, onyń 49 jylynda basshylyq qyzmetterde jumys istegen.
Aita keteiik, jýyrda depýtat Májilis minberinde Soltústik Qazaqstanǵa baryp, basqa memlekette júrgendei sezingenin aitty.
Mádeniet jáne bilim berý máseleleri boiynsha zańdarǵa ózgerister men tolyqtyrýlar engizý týraly zań jobasyn talqylaý barysynda depýtat Jigýli Dairabaev til máselesin kóterdi.
