ءماجىلىس دەپۋتاتى جيگۋلي دايرابايەۆ "اۋىل" پارتياسىنداعى قىزمەتىنەن نە ءۇشىن كەتكەنىن ءتۇسىندىردى، دەپ حابارلايدى Dalanews.kz.
"پارتياعا جاستار كەلىپ جاتىر. ول دەپۋتاتتىق ساۋالىممەن بايلانىستى ەمەس"، دەپ قىسقا قايىردى دايرابايەۆ.
27 اقپاندا وتكەن «اۋىل» پارتياسى ساياسي كەڭەسى ءتورالقاسىنىڭ وتىرىسىندا جيگۋلي دايرابايەۆ پارتيا ءتوراعاسىنىڭ ورىنباسارى قىزمەتىنەن بوساتىلدى. بۇل تۋرالى پارتيانىڭ باسپا ءسوز قىزمەتى جەتكىزدى.
دايرابايەۆ 2023 جىلدان بەرى VIII شاقىرىلعان ق ر پارلامەنتى ءماجىلىسىنىڭ دەپۋتاتى قىزمەتىن اتقارىپ كەلەدى. ول قازاق اۋىلشارۋاشىلىعى ينستيتۋتىندا ءبىلىم الىپ، عالىم-اگرونوم ماماندىعىن مەڭگەرگەن.
ءار جىلدارى ءتۇرلى لاۋازىمداردا قىزمەت ەتكەن:
- 2015-2019 جىلدارى – «قازاقستان فەرمەرلەر وداعى» قب-نىڭ جامبىل وبلىستىق فيليالىنىڭ ءتوراعاسى؛
- 2019 جىلدىڭ جەلتوقسانىنان باستاپ «قازاقستان فەرمەرلەر وداعى» قب پرەزيدەنتى؛
- 2020 جىلدىڭ ماۋسىمىنان قازاقستان فەرمەرلەرى قاۋىمداستىعىنىڭ باسقارما ءتوراعاسى؛
- 2022 جىلدىڭ ماۋسىمىنان «اتامەكەن» ق ر كاسىپكەرلەر پالاتاسى اگروونەركاسىپتىك كەشەنى كوميتەتىنىڭ ءتوراعاسى؛
- 2022 جىلدىڭ جەلتوقسانىندا «اۋىل» حدپ ءتوراعاسىنىڭ ورىنباسارى بولىپ سايلانعان؛
- 2021 جىلى جەر رەفورماسى جونىندەگى رەسپۋبليكالىق كوميسسيا ءتوراعاسىنىڭ ورىنباسارى بولدى.
جيگۋلي دايرابايەۆتىڭ جالپى ەڭبەك ءوتىلى 52 جىلدان اسادى، ونىڭ 49 جىلىندا باسشىلىق قىزمەتتەردە جۇمىس ىستەگەن.
ايتا كەتەيىك، جۋىردا دەپۋتات ءماجىلىس مىنبەرىندە سولتۇستىك قازاقستانعا بارىپ، باسقا مەملەكەتتە جۇرگەندەي سەزىنگەنىن ايتتى.
مادەنيەت جانە ءبىلىم بەرۋ ماسەلەلەرى بويىنشا زاڭدارعا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاۋ بارىسىندا دەپۋتات جيگۋلي دايرابايەۆ ءتىل ماسەلەسىن كوتەردى.
