Májilis depýtaty Baqytjan Bazarbek ulttyq banktiń saiasatynyń tiimdiligine kúmán keltirdi. Onyń aitýynsha, elde ne infliatsiialyq kútýler tym joǵary, ne retteýshi organnyń ózi kóringendei myqty emes, dep habarlaidy Dalanews.kz.
2024 jyldyń jeltoqsanynda negizgi mólsherleme 15,25%-ǵa, al 2025 jyldyń naýryzynda 16,5%-ǵa deiin kóterildi. Soǵan qaramastan, infliatsiia jyl basynda 8,6% bolsa, naýryzda 10%-ǵa jetken.
Ulttyq bank tóraǵasy Timýr Súleimenov bul máselemen jumys belsendi túrde júrip jatqanyn aitty. Onyń aitýynsha, basty másele – aýqymdy fiskaldyq yntalandyrýda.
"2024–2025 jyldary biz Ulttyq qordan kóp kólemde qarjy aldyq. Ótken jyly shamamen 6 trln teńge, biyl 5,3 trln teńgeni qaitadan qorǵa qaitardyq. Biraq ainalymdaǵy aqsha massasy báribir ósip jatyr. Eger statistikaǵa qarasaq, biylǵy birinshi toqsanda aqsha massasynyń ósýi shamamen 18%-dy qurady, al JIÓ-niń nominaldy ósimi – 13%. Iaǵni taýarǵa shaqqandaǵy aqshadaǵy aiyrma 4,5–5% bolyp tur", – dep túsindirdi Súleimenov.
Ol el ishindegi óndiristi jyldam arttyrý úshin taýar massasyn kóbeitý jáne bizneske qoiylatyn biýrokratiialyq kedergilerdi joiý qajettigin atap ótti.
Sonymen qatar, retteýshi basshysy infliatsiiany tejeý boiynsha keshendi sharalar toptamasy jaqyn arada tanystyrylatynyn aitty.
Aita keteiik, Bazarbek úkimettiń sheshimderin alǵash ret synap otyrǵan joq. Maýsym aiynyń basynda ol Densaýlyq saqtaý ministrligi men «SK-Farmatsiiany» áreketsizdikke bailanysty synǵa alǵan edi.
