Májilis otyrysynda depýtat Baqytjan Bazarbek energetika ministri Almasadam Sátqalievke saýal joldap, eldegi mańyzdy máseleni kóterdi, dep habarlaidy Dalanews.kz.
Ol ótken jyly jylýmen jabdyqtaý obektilerinde oryn alǵan keleńsiz jaittarǵa bailanysty jaýapty tulǵalarǵa qandai jaýapkershilik júktelgenin surady.
"2022-2023 jyldary jylýmen jabdyqtaý obektilerinde birqatar iri tehnikalyq aqaý boldy. Oǵan menshik ieleriniń, iaǵni oligarhtardyń kásiporyndardy qoldaý jáne jóndeý jumystaryna durys qarajat bólmeýi sebep boldy.
Sondyqtan depýtattar zań jobasynda Ekibastuz, Ridder jáne basqa qalalarda bolǵan qaiǵyly oqiǵalar qaitalanbas úshin, jylýmen jabdyqtaý obektileriniń durys jumys isteýin qamtamasyz etý maqsatynda aktsionerlerdiń menshik ieleri – sol oligarhtardyń jaýapkershiligin bekitýdi usyndy. Osy másele boiynsha óz ustanymyńyzdy bildirseńiz. Siz bul oligarhtarǵa qatań talap qoiyp, jaýapkershilik júkteýge daiynsyz ba?", – dep suraq qoidy Baqytjan Bazarbek.
Al energetika ministri kásiporyn ieleriniń quqyǵyna bailanysty arnaiy zań bekitilgenin jáne jaýapty tulǵalardyń ústinen is qozǵalǵanyn da atap ótti.
"Aktsionerlerdiń quqyqtaryn qorǵaýǵa bailanysty norma bar jáne kásiporyn aktsionerleriniń bir bóliginiń bul obektilerdi basqarý múmkindigi joq. Iaǵni, bizde IPO-ǵa shyqqan kásiporyndar bar, kóptegen aktsioner bar jáne belgili bir energetika nysanynyń jumys isteýi úshin barlyǵyna jaýapkershilik júkteý sai kelmeitin tárizdi.
Sonymen qatar, belgili bir apattardy tekserý barysynda qylmystyq ister qozǵalyp, jaýapty tulǵalardyń bir bóligi zańǵa sáikes jazalandy. Investitsiialyq baǵdarlamalardy oryndaý boiynsha mindettemelerdiń buzylýyna jol bermeý maqsatynda aktsionerlerdiń qarajat alý múmkindigine jetkilikti tereń tekserýler júrgizildi. Monopoliiasyzdandyrý jónindegi komissiia sheńberinde nemquraily menshik ielerinen aktivterdi memlekettik menshikke qaitarý boiynsha sharalar qabyldandy. Ózderińiz biletindei, Ekibastuz JEO, Ridder JEO jáne basqa da birqatar nysan memleketke qaitaryldy", – dep atap ótti Sátqaliev.
Aita keteiik, búgin májilis otyrysynda "Qazaqstan Respýblikasynyń keibir zańnamalyq aktilerine jylý energetikasy jáne elektr energetikasy máseleleri boiynsha ózgerister men tolyqtyrýlar engizý týraly" Qazaqstan Respýblikasy zańynyń jobasy talqylandy.
Eske salaiyq, Baqytjan Bazarbek eldegi mańyzdy máselelerdi jii kóteredi. Buǵan deiin ol Qazaqstannyń milliondaǵan gektar ulan baitaq jeri jeke adamdarǵa zańsyz ótip ketkenin aitqan bolatyn.
"10 million jer memlekettik menshikke qaitaryldy. 10 million bostan-bos jer emes. Qaraǵandy oblysynda 1 million gektar jer bir JShS-nyń qolynda. Kóbi "qarapaiymnan jerdi alasyzdar da, úlken dókeilerden almaisyzdar" deidi. Bul jumys endi bastaldy. Búkil ákimdiktiń baqylaý fýnktsiialaryn jer resýrsyn basqarý komitetine endi ǵana qaitardy. Oǵan aryz jazdyq. Sóitip, jeńiske jetip, tolyq ókilettilikti berdik", - degen bolatyn Bazarbek.
Sonymen qatar ol 2021 jyldan bastap QazUÝ jeri, Almatynyń Ile-Alataý saiabaǵynyń jeri, taýlary, alma baqtary jekeniń qolyna ótip ketkenin de jetkizdi. Onyń ishinde Ál-Farabi atyndaǵy Qazaq ulttyq ýniversitetiniń jeri áli kúnge deiin qaitarylmai jatqanyn málimdedi. Buǵan tikelei Almatynyń burynǵy ákimi Baýyrjan Baibektiń qatysy bar dep kórsetti.
"2022 jyly sybailas jemqorlyqqa qarsy is-qimyl agenttiginiń Almaty qalasy departamentine óz atymnan… 2018-2019 jyldary Baýyrjan Baibek ákim bolyp turǵan kezde qaýly qabyldaǵan. 2017-2019 jyldar aralyǵynda 8-ge jýyq qaýly qabyldaǵan. Sonyń saldarynan QazUÝ jeri, alma baqtary, taýly bókterdegi jerler ótip ketken. Soǵan bailanysty qylmystyq is qozǵaý týraly sybailas jemqorlyqqa qarsy is-qimyl agenttigine tiisti aryzdy joldadym. Biraq ókinishke qarai, QazUÝ jerine bailanysty Almaty qalasynyń antikor departamenti isti qozǵaýdan bas tartty", – degen edi ol.
