ءماجىلىس وتىرىسىندا دەپۋتات باقىتجان بازاربەك ەنەرگەتيكا ءمينيسترى الماسادام ساتقالييەۆكە ساۋال جولداپ، ەلدەگى ماڭىزدى ماسەلەنى كوتەردى، دەپ حابارلايدى Dalanews.kz.
ول وتكەن جىلى جىلۋمەن جابدىقتاۋ وبەكتىلەرىندە ورىن العان كەلەڭسىز جايتتارعا بايلانىستى جاۋاپتى تۇلعالارعا قانداي جاۋاپكەرشىلىك جۇكتەلگەنىن سۇرادى.
"2022-2023 جىلدارى جىلۋمەن جابدىقتاۋ وبەكتىلەرىندە ءبىرقاتار ءىرى تەحنيكالىق اقاۋ بولدى. وعان مەنشىك يەلەرىنىڭ، ياعني وليگارحتاردىڭ كاسىپورىنداردى قولداۋ جانە جوندەۋ جۇمىستارىنا دۇرىس قاراجات بولمەۋى سەبەپ بولدى.
سوندىقتان دەپۋتاتتار زاڭ جوباسىندا ەكىباستۇز، ريددەر جانە باسقا قالالاردا بولعان قايعىلى وقيعالار قايتالانباس ءۇشىن، جىلۋمەن جابدىقتاۋ وبەكتىلەرىنىڭ دۇرىس جۇمىس ىستەۋىن قامتاماسىز ەتۋ ماقساتىندا اكسيونەرلەردىڭ مەنشىك يەلەرى – سول وليگارحتاردىڭ جاۋاپكەرشىلىگىن بەكىتۋدى ۇسىندى. وسى ماسەلە بويىنشا ءوز ۇستانىمىڭىزدى بىلدىرسەڭىز. ءسىز بۇل وليگارحتارعا قاتاڭ تالاپ قويىپ، جاۋاپكەرشىلىك جۇكتەۋگە دايىنسىز با؟"، – دەپ سۇراق قويدى باقىتجان بازاربەك.
ال ەنەرگەتيكا ءمينيسترى كاسىپورىن يەلەرىنىڭ قۇقىعىنا بايلانىستى ارنايى زاڭ بەكىتىلگەنىن جانە جاۋاپتى تۇلعالاردىڭ ۇستىنەن ءىس قوزعالعانىن دا اتاپ ءوتتى.
"اكسيونەرلەردىڭ قۇقىقتارىن قورعاۋعا بايلانىستى نورما بار جانە كاسىپورىن اكسيونەرلەرىنىڭ ءبىر بولىگىنىڭ بۇل وبەكتىلەردى باسقارۋ مۇمكىندىگى جوق. ياعني، بىزدە IPO-عا شىققان كاسىپورىندار بار، كوپتەگەن اكسيونەر بار جانە بەلگىلى ءبىر ەنەرگەتيكا نىسانىنىڭ جۇمىس ىستەۋى ءۇشىن بارلىعىنا جاۋاپكەرشىلىك جۇكتەۋ ساي كەلمەيتىن ءتارىزدى.
سونىمەن قاتار، بەلگىلى ءبىر اپاتتاردى تەكسەرۋ بارىسىندا قىلمىستىق ىستەر قوزعالىپ، جاۋاپتى تۇلعالاردىڭ ءبىر بولىگى زاڭعا سايكەس جازالاندى. ينۆەستيسيالىق باعدارلامالاردى ورىنداۋ بويىنشا مىندەتتەمەلەردىڭ بۇزىلۋىنا جول بەرمەۋ ماقساتىندا اكسيونەرلەردىڭ قاراجات الۋ مۇمكىندىگىنە جەتكىلىكتى تەرەڭ تەكسەرۋلەر جۇرگىزىلدى. مونوپولياسىزداندىرۋ جونىندەگى كوميسسيا شەڭبەرىندە نەمقۇرايلى مەنشىك يەلەرىنەن اكتيۆتەردى مەملەكەتتىك مەنشىككە قايتارۋ بويىنشا شارالار قابىلداندى. وزدەرىڭىز بىلەتىندەي، ەكىباستۇز جەو، ريددەر جەو جانە باسقا دا ءبىرقاتار نىسان مەملەكەتكە قايتارىلدى"، – دەپ اتاپ ءوتتى ساتقالييەۆ.
ايتا كەتەيىك، بۇگىن ءماجىلىس وتىرىسىندا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جىلۋ ەنەرگەتيكاسى جانە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسى زاڭىنىڭ جوباسى تالقىلاندى.
ەسكە سالايىق، باقىتجان بازاربەك ەلدەگى ماڭىزدى ماسەلەلەردى ءجيى كوتەرەدى. بۇعان دەيىن ول قازاقستاننىڭ ميلليونداعان گەكتار ۇلان بايتاق جەرى جەكە ادامدارعا زاڭسىز ءوتىپ كەتكەنىن ايتقان بولاتىن.
"10 ميلليون جەر مەملەكەتتىك مەنشىككە قايتارىلدى. 10 ميلليون بوستان-بوس جەر ەمەس. قاراعاندى وبلىسىندا 1 ميلليون گەكتار جەر ءبىر جشس-نىڭ قولىندا. كوبى "قاراپايىمنان جەردى الاسىزدار دا، ۇلكەن دوكەيلەردەن المايسىزدار" دەيدى. بۇل جۇمىس ەندى باستالدى. بۇكىل اكىمدىكتىڭ باقىلاۋ فۋنكسيالارىن جەر رەسۋرسىن باسقارۋ كوميتەتىنە ەندى عانا قايتاردى. وعان ارىز جازدىق. ءسويتىپ، جەڭىسكە جەتىپ، تولىق وكىلەتتىلىكتى بەردىك"، - دەگەن بولاتىن بازاربەك.
سونىمەن قاتار ول 2021 جىلدان باستاپ قازۇۋ جەرى، الماتىنىڭ ىلە-الاتاۋ ساياباعىنىڭ جەرى، تاۋلارى، الما باقتارى جەكەنىڭ قولىنا ءوتىپ كەتكەنىن دە جەتكىزدى. ونىڭ ىشىندە ءال-فارابي اتىنداعى قازاق ۇلتتىق ۋنيۆەرسيتەتىنىڭ جەرى ءالى كۇنگە دەيىن قايتارىلماي جاتقانىن مالىمدەدى. بۇعان تىكەلەي الماتىنىڭ بۇرىنعى اكىمى باۋىرجان بايبەكتىڭ قاتىسى بار دەپ كورسەتتى.
"2022 جىلى سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى دەپارتامەنتىنە ءوز اتىمنان… 2018-2019 جىلدارى باۋىرجان بايبەك اكىم بولىپ تۇرعان كەزدە قاۋلى قابىلداعان. 2017-2019 جىلدار ارالىعىندا 8-گە جۋىق قاۋلى قابىلداعان. سونىڭ سالدارىنان قازۇۋ جەرى، الما باقتارى، تاۋلى بوكتەردەگى جەرلەر ءوتىپ كەتكەن. سوعان بايلانىستى قىلمىستىق ءىس قوزعاۋ تۋرالى سىبايلاس جەمقورلىققا قارسى ءىس-قيمىل اگەنتتىگىنە ءتيىستى ارىزدى جولدادىم. ءبىراق وكىنىشكە قاراي، قازۇۋ جەرىنە بايلانىستى الماتى قالاسىنىڭ انتيكور دەپارتامەنتى ءىستى قوزعاۋدان باس تارتتى"، – دەگەن ەدى ول.
