Resei Federatsiiasyna kirýge tyiym salynǵan tulǵalar qatarynda Májilis depýtaty Ermurat Bapi de bar ekeni aityldy. Bul týraly DW jazdy, - dep habarlaidy Dalanews.kz.
Basylym "Kazahstan-Rossiia: kto v zakrytom spiske nejelatelnyh lits" degen ataýmen Qazaqstan men Resei, eki el kirýge tyiym salǵan tulǵalar týrasynda maqala jazǵan.
"Qazaqstandyq sarapshylarmen áńgimelesýden keiin Resei óz aýmaǵyna kirýge tyiym salǵan Qazaqstannyń keibir azamattarynyń esimderin anyqtaýǵa múmkindik týdy. Olardyń qatarynda saiasattanýshylar Dosym Sátpaev pen Dimash Áljanov, qoǵam qairatkerleri Muhtar Taijan men Toǵjan Qojaly, Qazaqstan Parlamentiniń depýtattary Ermurat Bapi men Aidos Sarym bar", - dep jazdy basylym.
Depýtat Aidos Sarym DW-ge bergen suhbatynda bul jaily 2021 jyly bilgenin málimdedi.
"Bizdiń delegatsiiamyz Briýsseldegi konferentsiiaǵa Máskeý arqyly ushpaq boldy. Eki reistiń arasynda 9 saǵat úzilis boldy. Al Qazaqstannyń Reseidegi elshiligi bizge Máskeýdegi óz sharalaryna qatysýdy usyndy. Alaida diplomatiialyq tólqujatym bolsa da, meni qalaǵa kirgizbedi. Delegatsiia tolyq ótti, men ǵana qalyp qoidym. Shekara baqylaýyn da kóp ýaqyt ótkizýge týra keldi, konsýldy da shaqyrttym. Keiin FQK-niń bir ofitseri kelip, maǵan "persona non grata" ekenimdi rastaityn qujatty tabystady. Kirýge nelikten tyiym salynǵany túsindirilmedi. Eger bul erejeni qaita buzsam, segiz jylǵa deiin bas bostandyǵymnan aiyrylýym múmkin eken", – dedi depýtat.
Eske salaiyq, buǵan deiin de Aidos Sarymǵa 2070 jylǵa deiin Reseige kirýge tyiym salynǵanyn jazǵan edik. Onyń sózinshe, Reseide 2070 jylǵa deiin non-grata persona retinde tanylǵan. Eger Reseige kirgen jaǵdaida qylmystyq qýdalaýǵa ushyraýy múmkin.
"SIM (Qazaqstannyń - esk.) Tina Kandelakidi non-grata personasy dep tanydy. Durys. Oǵan artyq sóz, emotsiia jumsaýdyń qajeti joq. Ózińdi qurmettei bilý kerek. Men ózim de Reseide 2070 jylǵa deiin non-grata personasy dep tanylǵanmyn. Eldiń Federaldy qaýipsizdik qyzmeti (FSB-esk.) maǵan eskertý jibergen, iaǵni shekaradan ótsem 7 jylǵa deiin qylmystyq qýdalaýǵa tap bolýym múmkin. Belarýste de solai... Eshkim eshteńe túsindirgen joq...", - dedi Aidos Sarym buǵan deiin.
