Pavlodar oblysy QAJ departamentiniń AP-162/4 qaýipsizdigi joǵary mekemesi jedel bóliminiń eks-jedel ýákili Tasbolat Jaqaevtyń beıneúndeýi Mıhaıl Kozachkovtyń Telegram-arnasynda jarıalandy.
Vıdeoda polısıa kıimindegi eks-qyzmetker bıyl 12 qańtarda saǵat 20.00 shamasynda mekeme bastyǵynyń rejım jáne jedel jumys jónindegi orynbasarynyń buıryǵymen oǵan bólim bastyǵymen birge qara dorba ákelgenin, sodan keıin jumystan ketýge májbúr bolǵanyn aıtady. Biraq avtor dorbada ne bolǵanyn naqtylamaıdy.
– 2022 jyly 14 qańtarda meni departamentke shaqyrdy. Onda departament bastyǵynyń orynbasary qorqytyp, jumystan shyǵý týraly óz erkimmen baıanat jazýǵa májbúr etti. Sodan keıin meni jáne jasaq bastyǵyn jumystan shyǵardy, – dedi Jaqaev.
Er adam oblystyq QAJD basshylyǵyna júgingenin, biraq sózine eshkim qulaq aspaǵanyn aıtty.
– Osy jaǵdaıdy anyqtaýyńyzdy suraımyn. Ádildik ornaǵanyn qalaımyn, óıtkeni zeınetke shyǵýǵa eki jyl qaldy. Men – tórt balanyń ákesimin. Buǵan deıin qyzmetke qatysty shaǵym bolǵan joq, – dedi Jaqaev.
Pavlodar oblysy QAJ Departamenti qatań rejımdegi kolonıa qyzmetkeri óz erkimen jumystan shyqqanyn rastady. Sonymen qatar, vıdeo avtory aıtqan derekter tekserilip jatqanyn málimdedi.
– 2022 jyldyń 14 qańtarynda T.T. Jaqaevtan QAJD kadr saıasaty bólimine óz erkimen İshki ister organdarynan jumystan bosatý týraly baıanat tústi. 17 qańtarda Pavlodar oblysy boıynsha QAJ Departamenti bastyǵynyń buıryǵymen "Quqyq qorǵaý qyzmeti týraly" QRZ 80-baby 1-tarmaǵynyń 5-tarmaqshasy boıynsha İİO-dan bosatyldy. Ótinishte baıandalǵan barlyq derek boıynsha qaýipsizdik toby qyzmettik tekserý júrgizedi, – dedi Pavlodar oblysy boıynsha QAJD baspasóz qyzmeti ókili.
