پاۆلودار وبلىسى قاج دەپارتامەنتىنىڭ اپ-162/4 قاۋىپسىزدىگى جوعارى مەكەمەسى جەدەل ءبولىمىنىڭ ەكس-جەدەل ۋاكىلى تاسبولات جاقايەۆتىڭ بەينەۇندەۋى ميحايل كوزاچكوۆتىڭ Telegram-ارناسىندا جاريالاندى.
ۆيدەودا پوليسيا كيىمىندەگى ەكس-قىزمەتكەر بيىل 12 قاڭتاردا ساعات 20.00 شاماسىندا مەكەمە باستىعىنىڭ رەجيم جانە جەدەل جۇمىس جونىندەگى ورىنباسارىنىڭ بۇيرىعىمەن وعان ءبولىم باستىعىمەن بىرگە قارا دوربا اكەلگەنىن، سودان كەيىن جۇمىستان كەتۋگە ءماجبۇر بولعانىن ايتادى. ءبىراق اۆتور دوربادا نە بولعانىن ناقتىلامايدى.
– 2022 جىلى 14 قاڭتاردا مەنى دەپارتامەنتكە شاقىردى. وندا دەپارتامەنت باستىعىنىڭ ورىنباسارى قورقىتىپ، جۇمىستان شىعۋ تۋرالى ءوز ەركىممەن بايانات جازۋعا ءماجبۇر ەتتى. سودان كەيىن مەنى جانە جاساق باستىعىن جۇمىستان شىعاردى، – دەدى جاقايەۆ.
ەر ادام وبلىستىق قاجد باسشىلىعىنا جۇگىنگەنىن، ءبىراق سوزىنە ەشكىم قۇلاق اسپاعانىن ايتتى.
– وسى جاعدايدى انىقتاۋىڭىزدى سۇرايمىن. ادىلدىك ورناعانىن قالايمىن، ويتكەنى زەينەتكە شىعۋعا ەكى جىل قالدى. مەن – ءتورت بالانىڭ اكەسىمىن. بۇعان دەيىن قىزمەتكە قاتىستى شاعىم بولعان جوق، – دەدى جاقايەۆ.
پاۆلودار وبلىسى قاج دەپارتامەنتى قاتاڭ رەجيمدەگى كولونيا قىزمەتكەرى ءوز ەركىمەن جۇمىستان شىققانىن راستادى. سونىمەن قاتار، ۆيدەو اۆتورى ايتقان دەرەكتەر تەكسەرىلىپ جاتقانىن مالىمدەدى.
– 2022 جىلدىڭ 14 قاڭتارىندا ت.ت. جاقايەۆتان قاجد كادر ساياساتى بولىمىنە ءوز ەركىمەن ىشكى ىستەر ورگاندارىنان جۇمىستان بوساتۋ تۋرالى بايانات ءتۇستى. 17 قاڭتاردا پاۆلودار وبلىسى بويىنشا قاج دەپارتامەنتى باستىعىنىڭ بۇيرىعىمەن "قۇقىق قورعاۋ قىزمەتى تۋرالى" قرز 80-بابى 1-تارماعىنىڭ 5-تارماقشاسى بويىنشا ءىىو-دان بوساتىلدى. وتىنىشتە باياندالعان بارلىق دەرەك بويىنشا قاۋىپسىزدىك توبى قىزمەتتىك تەكسەرۋ جۇرگىزەدى، – دەدى پاۆلودار وبلىسى بويىنشا قاجد باسپا ءسوز قىزمەتى وكىلى.
