Ońtústik Qazaqstan oblysy kásipkerlik salasy boıynsha eń belsendi oblystardyń biri.  Sondyqtan da munda kásibin iske asyrýǵa nıetti adamdar kóp, biraq kóbinese olardyń óz bıznesin jasaýǵa múmkinshiligi jetpeı jatady. Eń birinshi sebep – bul kepil múlkiniń joqtyǵy nemese jetkiliksizdigi. Osy máseleni sheshý maqsatynda «Ońtústik» ınvestısıalyq ortalyǵy «Agrarlyq nesıe korporasıasy» AQ - men kelissóz júrgizip, «Daıyn bıznes» degen jańa baǵdarlamany iske asyrmaq.



Baǵdarlamanyń basty ereksheligi – kásipkerden avans retinde alǵashqy jarna alyp bıznesti qurý, sonymen «Daıyn bıznesti» kásipkerge ótkizip, sol bıznestiń ózin kepildik retinde qabyldaıdy. Bul proses «Agrarlyq nesıe korporasıasy» AQ-dan qarjy tartý arqyly júzege asyrylatyn bolady.

Atalǵan baǵdarlama aıasynda kompanıa birneshe baǵyt boıynsha jobalar ázirleýde. Olardyń biri jalpy aýmaǵy 45 gektar bolatyn «Badam» jylyjaı ónerkásip keshenin qurý. «Badam» ındýstrıaldy aımaǵynda ornalasatyn jylyjaıdyń 70 paıyzy jergilikti taýar óndirýshilerdiń taýarlarymen jabdyqtalatyn bolady.



Sonymen qatar, táýligine 1000 lıtr sút ónimderin óńdeý jáne satýǵa qaýqarly «Aýyldyq sút zaýytyn qurý». Sút zaýyty-zerthana, sút qabyldaý bólimi, tońazytqysh, jabdyqtardy sanıtarlyq tazartý, shaǵyn dúken sıaqty bólimderden quralatyn bolady.

Osyndaı júıe negizinde táýligine 1000 keli. shujyq ónimderin óńdeý jáne satýǵa qaýqarly «Aýyldyq shujyq sehyn qurý» jobasy boıynsha da jumystar júrgizilýde. Bul jobalar tolyq iske qosylatyn dárejege jetkizilip, «daıyn bıznes» retinde kásipkerge lızıń etip usynylatyn bolady.

 

OQO ákiminiń baspasóz qyzmeti