Baǵdarlamanyń basty ereksheligi – kásipkerden avans retinde alǵashqy jarna alyp biznesti qurý, sonymen «Daiyn biznesti» kásipkerge ótkizip, sol biznestiń ózin kepildik retinde qabyldaidy. Bul protsess «Agrarlyq nesie korporatsiiasy» AQ-dan qarjy tartý arqyly júzege asyrylatyn bolady.
Atalǵan baǵdarlama aiasynda kompaniia birneshe baǵyt boiynsha jobalar ázirleýde. Olardyń biri jalpy aýmaǵy 45 gektar bolatyn «Badam» jylyjai ónerkásip keshenin qurý. «Badam» indýstrialdy aimaǵynda ornalasatyn jylyjaidyń 70 paiyzy jergilikti taýar óndirýshilerdiń taýarlarymen jabdyqtalatyn bolady.
Sonymen qatar, táýligine 1000 litr sút ónimderin óńdeý jáne satýǵa qaýqarly «Aýyldyq sút zaýytyn qurý». Sút zaýyty-zerthana, sút qabyldaý bólimi, tońazytqysh, jabdyqtardy sanitarlyq tazartý, shaǵyn dúken siiaqty bólimderden quralatyn bolady.
Osyndai júie negizinde táýligine 1000 keli. shujyq ónimderin óńdeý jáne satýǵa qaýqarly «Aýyldyq shujyq tsehyn qurý» jobasy boiynsha da jumystar júrgizilýde. Bul jobalar tolyq iske qosylatyn dárejege jetkizilip, «daiyn biznes» retinde kásipkerge lizing etip usynylatyn bolady.
OQO ákiminiń baspasóz qyzmeti
