وڭتۇستىك قازاقستان وبلىسى كاسىپكەرلىك سالاسى بويىنشا ەڭ بەلسەندى وبلىستاردىڭ ءبىرى.  سوندىقتان دا مۇندا كاسىبىن ىسكە اسىرۋعا نيەتتى ادامدار كوپ، ءبىراق كوبىنەسە ولاردىڭ ءوز بيزنەسىن جاساۋعا مۇمكىنشىلىگى جەتپەي جاتادى. ەڭ ءبىرىنشى سەبەپ – بۇل كەپىل مۇلكىنىڭ جوقتىعى نەمەسە جەتكىلىكسىزدىگى. وسى ماسەلەنى شەشۋ ماقساتىندا «وڭتۇستىك» ينۆەستيسيالىق ورتالىعى «اگرارلىق نەسيە كورپوراسياسى» اق - مەن كەلىسسوز جۇرگىزىپ، «دايىن بيزنەس» دەگەن جاڭا باعدارلامانى ىسكە اسىرماق.



باعدارلامانىڭ باستى ەرەكشەلىگى – كاسىپكەردەن اۆانس رەتىندە العاشقى جارنا الىپ بيزنەستى قۇرۋ، سونىمەن «دايىن بيزنەستى» كاسىپكەرگە وتكىزىپ، سول بيزنەستىڭ ءوزىن كەپىلدىك رەتىندە قابىلدايدى. بۇل پروسەسس «اگرارلىق نەسيە كورپوراسياسى» اق-دان قارجى تارتۋ ارقىلى جۇزەگە اسىرىلاتىن بولادى.

اتالعان باعدارلاما اياسىندا كومپانيا بىرنەشە باعىت بويىنشا جوبالار ازىرلەۋدە. ولاردىڭ ءبىرى جالپى اۋماعى 45 گەكتار بولاتىن «بادام» جىلىجاي ونەركاسىپ كەشەنىن قۇرۋ. «بادام» يندۋستريالدى ايماعىندا ورنالاساتىن جىلىجايدىڭ 70 پايىزى جەرگىلىكتى تاۋار وندىرۋشىلەردىڭ تاۋارلارىمەن جابدىقتالاتىن بولادى.



سونىمەن قاتار، تاۋلىگىنە 1000 ليتر ءسۇت ونىمدەرىن وڭدەۋ جانە ساتۋعا قاۋقارلى «اۋىلدىق ءسۇت زاۋىتىن قۇرۋ». ءسۇت زاۋىتى-زەرتحانا، ءسۇت قابىلداۋ ءبولىمى، توڭازىتقىش، جابدىقتاردى سانيتارلىق تازارتۋ، شاعىن دۇكەن سياقتى بولىمدەردەن قۇرالاتىن بولادى.

وسىنداي جۇيە نەگىزىندە تاۋلىگىنە 1000 كەلى. شۇجىق ونىمدەرىن وڭدەۋ جانە ساتۋعا قاۋقارلى «اۋىلدىق شۇجىق سەحىن قۇرۋ» جوباسى بويىنشا دا جۇمىستار جۇرگىزىلۋدە. بۇل جوبالار تولىق ىسكە قوسىلاتىن دارەجەگە جەتكىزىلىپ، «دايىن بيزنەس» رەتىندە كاسىپكەرگە ليزينگ ەتىپ ۇسىنىلاتىن بولادى.

 

وقو اكىمىنىڭ باسپا ءسوز قىزمەتى