Kúni keshe ǵana Eýroparlamentte sóz sóilegen Ýrsýla fon der Liaien Resei prezidenti Valdimir Pýtin aldaǵy ýaqytta qaýat kózderin qarý retinde paidalanýy múmkin ekenin aityp, Kremldiń energetikalyq bopsasyna kónbeýge shaqyrdy.
– Bizder Reseiden gaz kelmei qalsa, oǵan tolyqtai daiyn bolýymyz kerek. Pýtin gaz ben munaidy bizge qarsy qarý retinde qoldanýy múmkin. Sondyqtan Reseidiń mundai áreketine daiyn bolyp, jaýap qaitarýǵa tiispiz, – dedi Ýrsýla fon der Liaien.
Óz kezeginde Eýrokomissiianyń tóraiymy Reseiden kelten gaz kúrt toqtaǵanda oǵan EýroOdaq elderi aýmaǵyndaǵy óndiris oshaqtarynyń daiyn bolýy úshin arnaiy joba daiyndalyp jatqanyn da alǵa tartty. Osylaisha kári qurlyq elderi kez kelgen tótenshe jaǵdaiǵa daiyn bolýǵa barynsha árekettenýde.
EýroOdaq elderi osyǵan deiin ózderine qajetti gazdyń 40%-yn Reseiden satyp alyp kelgeni belgili. Qazirgi tańda Eýropa elderi Reseidiń gazy men munaiyn AQSh pen Taiaý Shyǵys elderiniń munaiy men gazyna almastyrýǵa kúsh salyp jatyr.
Ústimizdegi jyldyń 27 sáýirinde Polsha men Bolgariia «Gazpromǵa» gaz úshin rýblmen tólem jasamaitynyn aityp, orystyń gazynan bas tartqan bolatyn. Al mamyr aiynda Resei Finliandiia men Gollandiiaǵa gaz jetkizýin toqtatsa, 1 maýsymnan bastap Daniia orys gazynan bas tartty.
EýroOdaq elderi aldaǵy ýaqytta AQSh pen Katrdan 50 mln tekshe metr suiytylǵan gazdy satyp alýdy jáne taǵy 10 mln tekshe metr gazdy qubyr arqyly jetkizýdi kózdep otyr.
Budan basqa osyǵan deiin jumysyn toqtatqan kómirmen isteitin JES-di qaitadan iske qospaqshy. Osylaisha EýroOdaq elderi orystyń energetikalyq qysymyna laiyqty jaýap berýge daiyndyqty bastap ketti.
