كۇنى كەشە عانا ەۋروپارلامەنتتە ءسوز سويلەگەن ۋرسۋلا فون دەر ليايەن رەسەي پرەزيدەنتى ۆالديمير پۋتين الداعى ۋاقىتتا قاۋات كوزدەرىن قارۋ رەتىندە پايدالانۋى مۇمكىن ەكەنىن ايتىپ، كرەملدىڭ ەنەرگەتيكالىق بوپساسىنا كونبەۋگە شاقىردى.
– بىزدەر رەسەيدەن گاز كەلمەي قالسا، وعان تولىقتاي دايىن بولۋىمىز كەرەك. پۋتين گاز بەن مۇنايدى بىزگە قارسى قارۋ رەتىندە قولدانۋى مۇمكىن. سوندىقتان رەسەيدىڭ مۇنداي ارەكەتىنە دايىن بولىپ، جاۋاپ قايتارۋعا ءتيىسپىز، – دەدى ۋرسۋلا فون دەر ليايەن.
ءوز كەزەگىندە ەۋروكوميسسيانىڭ ءتورايىمى رەسەيدەن كەلتەن گاز كۇرت توقتاعاندا وعان ەۋرووداق ەلدەرى اۋماعىنداعى ءوندىرىس وشاقتارىنىڭ دايىن بولۋى ءۇشىن ارنايى جوبا دايىندالىپ جاتقانىن دا العا تارتتى. وسىلايشا كارى قۇرلىق ەلدەرى كەز كەلگەن توتەنشە جاعدايعا دايىن بولۋعا بارىنشا ارەكەتتەنۋدە.
ەۋرووداق ەلدەرى وسىعان دەيىن وزدەرىنە قاجەتتى گازدىڭ 40%-ىن رەسەيدەن ساتىپ الىپ كەلگەنى بەلگىلى. قازىرگى تاڭدا ەۋروپا ەلدەرى رەسەيدىڭ گازى مەن مۇنايىن اقش پەن تاياۋ شىعىس ەلدەرىنىڭ مۇنايى مەن گازىنا الماستىرۋعا كۇش سالىپ جاتىر.
ۇستىمىزدەگى جىلدىڭ 27 ساۋىرىندە پولشا مەن بولگاريا «گازپرومعا» گاز ءۇشىن رۋبلمەن تولەم جاسامايتىنىن ايتىپ، ورىستىڭ گازىنان باس تارتقان بولاتىن. ال مامىر ايىندا رەسەي فينليانديا مەن گوللاندياعا گاز جەتكىزۋىن توقتاتسا، 1 ماۋسىمنان باستاپ دانيا ورىس گازىنان باس تارتتى.
ەۋرووداق ەلدەرى الداعى ۋاقىتتا اقش پەن كاتردان 50 ملن تەكشە مەتر سۇيىتىلعان گازدى ساتىپ الۋدى جانە تاعى 10 ملن تەكشە مەتر گازدى قۇبىر ارقىلى جەتكىزۋدى كوزدەپ وتىر.
بۇدان باسقا وسىعان دەيىن جۇمىسىن توقتاتقان كومىرمەن ىستەيتىن جەس-دى قايتادان ىسكە قوسپاقشى. وسىلايشا ەۋرووداق ەلدەرى ورىستىڭ ەنەرگەتيكالىق قىسىمىنا لايىقتى جاۋاپ بەرۋگە دايىندىقتى باستاپ كەتتى.
