Ol bul jaıtqa tanymal rejıser Olıver Stoýnnyń "Qazaq. Altyn adam tarıhy" atty derekti fılminiń aıasynda toqtaldy.
"Men úlken qatelik jiberdim. Ol (Álıev, red.) qarjy polısıasyna basshylyq etti. Sony paıdalanyp kásipkerlerge qysym kórsetti, olardyń bıznesin ıemdenip aldy, eńbekpen tapqan qarajatyn qaltasyna basty, bilgenin istedi. Sonyń bárine kýá bolǵan men: "Osy oradan toqta! Tyıyl!" dep eskertý jasadym. Oılap kórińizshi, týǵan kúıeýbalam osyndaı ospadar áreketke bardy", – deıdi Nazarbaev.
Eks-prezıdent Rahat Álıevti qyzynyń, bala-shaǵasynyń, qudasynyń kóńiline qaramaı quryqtaýǵa pármen bergenin aıtady.
"Qyzym úsh nemeremdi ertip keldi, onyń artynan ákesi jetti. Keshirýimdi ótindi. "Meniń qolymnan ne keledi? Ol ma, ol qylmysker. Aqıqaty osy" dep jaýap berdim", – deıdi Nazarbaev.
Stoýn óz tarapynan Elbasy úshin mundaı sheshim qabyldaý qanshalyqty aýyr bolǵanyn surady.
"Álbette, aýyr boldy. Bóten bireý bolsa, bir jón... Abaqtyǵa qamaýǵa emes, arqa súıeýge, senim artýǵa tıis óz adamyń...", – dedi eks-prezıdent.
Nazarbaev úlken qyzy Darıǵanyń bul taqyrypty talqylaǵysy kelmeıtinin jáne oǵan túsinistikpen qaraıtynyn jetkizdi.
Este bolsa, osydan 6-7 jyl buryn Nazarbaev Álıevtiń isine týǵan-týystyń qalaı qaraǵanyn aıtqan edi.
"Qyzym nemerelerimdi ertip, aldyma jylap keldi. Týǵan kúıeýbalamdy abaqtyǵa qamaý maǵan da ońaı soqqan joq. Ýaıymǵa salyndym. Alaıda Rahattyń qylyǵyna beıqam qaraýǵa bolmaıtyn edi, ony toqtatýdyń jalǵyz amaly osy boldy. Týys-týǵan oıymnan aınytýǵa tyrysty. Jaqyndarymnyń barlyǵyna osy arqyly eskertý jasadym, shekten shyqqan adamǵa jaza bar", – degen edi sol tusta Nazarbaev.
Aıta ketelik Rahat Álıev 2015 jyldyń 24 aqpanynda Venada ýaqytsha ustaý ızolátorynda asylyp qalǵan kúıinde tabylǵan.
