ول بۇل جايتقا تانىمال رەجيسسەر وليۆەر ستوۋننىڭ "Qazaq. التىن ادام تاريحى" اتتى دەرەكتى ءفيلمىنىڭ اياسىندا توقتالدى.
"مەن ۇلكەن قاتەلىك جىبەردىم. ول (الييەۆ، رەد.) قارجى پوليسياسىنا باسشىلىق ەتتى. سونى پايدالانىپ كاسىپكەرلەرگە قىسىم كورسەتتى، ولاردىڭ بيزنەسىن يەمدەنىپ الدى، ەڭبەكپەن تاپقان قاراجاتىن قالتاسىنا باستى، بىلگەنىن ىستەدى. سونىڭ بارىنە كۋا بولعان مەن: "وسى ورادان توقتا! تىيىل!" دەپ ەسكەرتۋ جاسادىم. ويلاپ كورىڭىزشى، تۋعان كۇيەۋبالام وسىنداي وسپادار ارەكەتكە باردى"، – دەيدى نازاربايەۆ.
ەكس-پرەزيدەنت راحات الييەۆتى قىزىنىڭ، بالا-شاعاسىنىڭ، قۇداسىنىڭ كوڭىلىنە قاراماي قۇرىقتاۋعا پارمەن بەرگەنىن ايتادى.
"قىزىم ءۇش نەمەرەمدى ەرتىپ كەلدى، ونىڭ ارتىنان اكەسى جەتتى. كەشىرۋىمدى ءوتىندى. "مەنىڭ قولىمنان نە كەلەدى؟ ول ما، ول قىلمىسكەر. اقيقاتى وسى" دەپ جاۋاپ بەردىم"، – دەيدى نازاربايەۆ.
ستوۋن ءوز تاراپىنان ەلباسى ءۇشىن مۇنداي شەشىم قابىلداۋ قانشالىقتى اۋىر بولعانىن سۇرادى.
"البەتتە، اۋىر بولدى. بوتەن بىرەۋ بولسا، ءبىر ءجون... اباقتىعا قاماۋعا ەمەس، ارقا سۇيەۋگە، سەنىم ارتۋعا ءتيىس ءوز ادامىڭ..."، – دەدى ەكس-پرەزيدەنت.
نازاربايەۆ ۇلكەن قىزى داريعانىڭ بۇل تاقىرىپتى تالقىلاعىسى كەلمەيتىنىن جانە وعان تۇسىنىستىكپەن قارايتىنىن جەتكىزدى.
ەستە بولسا، وسىدان 6-7 جىل بۇرىن نازاربايەۆ الييەۆتىڭ ىسىنە تۋعان-تۋىستىڭ قالاي قاراعانىن ايتقان ەدى.
"قىزىم نەمەرەلەرىمدى ەرتىپ، الدىما جىلاپ كەلدى. تۋعان كۇيەۋبالامدى اباقتىعا قاماۋ ماعان دا وڭاي سوققان جوق. ۋايىمعا سالىندىم. الايدا راحاتتىڭ قىلىعىنا بەيقام قاراۋعا بولمايتىن ەدى، ونى توقتاتۋدىڭ جالعىز امالى وسى بولدى. تۋىس-تۋعان ويىمنان اينىتۋعا تىرىستى. جاقىندارىمنىڭ بارلىعىنا وسى ارقىلى ەسكەرتۋ جاسادىم، شەكتەن شىققان ادامعا جازا بار"، – دەگەن ەدى سول تۇستا نازاربايەۆ.
ايتا كەتەلىك راحات الييەۆ 2015 جىلدىڭ 24 اقپانىندا ۆەنادا ۋاقىتشا ۇستاۋ يزولياتورىندا اسىلىپ قالعان كۇيىندە تابىلعان.
