Talǵardaǵy atyshýly is boiynsha ótip jatqan sot protsesinde aiyptalýshy Azamat Toqtaýbaev buryn sotta aitqan sózinen bas tartty. Ol osyǵan deiin sottalýshy Darhan Áskentaiǵa qatysty bergen málimdemesiniń shyndyqqa janaspaitynyn moiyndady, dep habarlaidy Dalanews.kz.
Aiyptalýshydan jaýap alý barysynda "Qamajai" dúkeni aldyndaǵy beinejazba kórsetildi.
Sot barysynda prokýror Dana Sársenbai Azamat Toqtaýbaevtan:
"Keshe tóraǵalyq etýshi sýdia sizden surady. Alǵashqy jaýabyńyzda Darhan eregesip turǵan balalardyń birin uryp jiberdi degen edińiz, keiin bul jaýabyńyzdy qoldamaimyn dep aittyńyz. Qobaljyp aittym dedińiz. Alaida odan keiingi jaýabyńyzda dál osy sózdi taǵy qaitaladyńyz. Sol kezde qandai kúide boldyńyz?" — dep surady.
"Ol sózimdi qoldamaimyn. Buǵan deiin Darhan týraly jalǵan aiǵaq berdim", - dep jaýap qatty Azamat Toqtaýbaev.
Prokýror odan aitylǵan sózinen ne úshin bas tartqanyn surady.
"Darhanǵa ashýly bolǵandyqtan, ony bizben birge jazaǵa tartylsyn dep oiladym. Biraq onyń bul iske qatysy joq. Eshkimdi urǵan joq, qolynda pyshaq ta bolmaǵan. Darhannyń bireýge kúsh kórsetkenin óz kózimmen kórmedim. Jala japtym demeimin, biraq ótirik aiǵaq berip qoidym. Sol jaýabym úshin ókinemin", — dedi ol.
Sonda siz Darhan Áskentaiǵa jalǵan jala japtyńyz ba?, - dep qaitalap surady Dana Sársenbai.
"Men jala japqan joqpyn. Ótirik aiǵaq berip jiberdim", - dep qosty sottalýshy.
