تالعارداعى اتىشۋلى ءىس بويىنشا ءوتىپ جاتقان سوت پروسەسىندە ايىپتالۋشى ازامات توقتاۋبايەۆ بۇرىن سوتتا ايتقان سوزىنەن باس تارتتى. ول وسىعان دەيىن سوتتالۋشى دارحان اسكەنتايعا قاتىستى بەرگەن مالىمدەمەسىنىڭ شىندىققا جاناسپايتىنىن مويىندادى، دەپ حابارلايدى Dalanews.kz.

ايىپتالۋشىدان جاۋاپ الۋ بارىسىندا "قاماجاي" دۇكەنى الدىنداعى بەينەجازبا كورسەتىلدى.

سوت بارىسىندا پروكۋرور دانا سارسەنباي ازامات توقتاۋبايەۆتان:

"كەشە ءتوراعالىق ەتۋشى سۋديا سىزدەن سۇرادى. العاشقى جاۋابىڭىزدا دارحان ەرەگەسىپ تۇرعان بالالاردىڭ ءبىرىن ۇرىپ جىبەردى دەگەن ەدىڭىز، كەيىن بۇل جاۋابىڭىزدى قولدامايمىن دەپ ايتتىڭىز. قوبالجىپ ايتتىم دەدىڭىز. الايدا ودان كەيىنگى جاۋابىڭىزدا ءدال وسى ءسوزدى تاعى قايتالادىڭىز. سول كەزدە قانداي كۇيدە بولدىڭىز؟" — دەپ سۇرادى.

"ول ءسوزىمدى قولدامايمىن. بۇعان دەيىن دارحان تۋرالى جالعان ايعاق بەردىم"، - دەپ جاۋاپ قاتتى ازامات توقتاۋبايەۆ. 

پروكۋرور ودان ايتىلعان سوزىنەن نە ءۇشىن باس تارتقانىن سۇرادى.

"دارحانعا اشۋلى بولعاندىقتان، ونى بىزبەن بىرگە جازاعا تارتىلسىن دەپ ويلادىم. ءبىراق ونىڭ بۇل ىسكە قاتىسى جوق. ەشكىمدى ۇرعان جوق، قولىندا پىشاق تا بولماعان. دارحاننىڭ بىرەۋگە كۇش كورسەتكەنىن ءوز كوزىممەن كورمەدىم. جالا جاپتىم دەمەيمىن، ءبىراق وتىرىك ايعاق بەرىپ قويدىم. سول جاۋابىم ءۇشىن وكىنەمىن"، — دەدى ول. 

سوندا ءسىز دارحان اسكەنتايعا جالعان جالا جاپتىڭىز با؟، - دەپ قايتالاپ سۇرادى دانا سارسەنباي.

"مەن جالا جاپقان جوقپىن. وتىرىك ايعاق بەرىپ جىبەردىم"، - دەپ قوستى سوتتالۋشى.