QR Densaýlyq saqtaý mınıstrligi Taýarlar men qyzmetter qaýipsizdiginiń sapasyn baqylaý komıteti tóraǵasynyń orynbasary Nurqan Sádýaqasov Ýhannan jetkizilgennen keıin karantınge jatqyzylǵan stýdentterdiń jaǵdaıyn aıtyp berdi, dep habarlaıdy Dalanews.kz.
"Ýhannan charterlik reıspen jetkizilgennen keıin karantınge 83 qazaqstandyq jatqyzyldy. Onyń ishinde 80 stýdent bar. Olardyń barlyǵy Nur-Sultan qalasyndaǵy kópbeıindi aýrýhanaǵa ornalastyryldy. Aýrýhana jańa, joǵary qaýipsizdik júıesimen jabdyqtalǵan. Árbir qabattaǵy palatalardyń derbes jeldetý júıesi bar. Bul óte jaqsy júıe, "taza úı-jaı" dep atalady. Ol aýanyń aralasýyna jol bermeıdi. Aýa palatadan dálizge jáne keri baǵytta shyqpaıdy", - dedi Nurqan Sádýaqasov.
Onyń atap ótýinshe, ushaq bortynda dárigerler taǵy bir márte termometrıa júrgizip, jolaýshylardyń qyzyýyn ólshegen.
"Ushaq bortyna kóterilgen kezde taǵy bir termometrıa júrgizgen edik. Iaǵnı, ushaqta olarmen birge sanıtarlyq avıasıanyń dárigerleri men dáriger-epıdemıolog boldy. Bir áıelde 37,2 dene qyzýy boldy. Biraq, onda qandaı da bir syrttaı belgileri (koronavıýrs belgileri) anyqtalǵan joq. Olar 2,3 jáne 4 oryndyq palatalarǵa ornalastyryldy, jaǵdaılary jáne tamaqtary óte jaqsy. Júkteri óńdelgennen keıin saqtaý qoımasyna tapsyryldy", - dedi ol.
Onyń sózine qaraǵanda, kópbeıindi aýrýhananyń ınfeksıalyq blogy bir-birinen oqshaýlanǵan.
"Qazaqstannyń barlyq qalalarynyń, negizinen Nur-Sultan, Almaty, Shymkent, Aqtaý, Semeıden, Almaty, Qaraǵandy oblystarynyń balalary. Olar bizdiń talaptarymyzben kelisip otyr. Sebebi ol jaqta da dál osyndaı talap bolǵan. Olar ınfeksıalyq bloktyń oqashaýlandyrylǵan palatalarynda jatyr, dálizge shyqpaıdy. Barynsha qaýipsizdik sharalaryn qabyldaýǵa mindettimiz", - dedi Nurqan Sádýaqasov.
Óz kezeginde Nur-Sultan qalalyq kópbeıindi medısınalyq ortalyǵy ınfeksıalyq blogy dırektorynyń orynbasary Sáýle Atyǵaeva karatınde jatqan adamdardyń jaǵdaıy qandaı ekendigin aıtyp berdi.
"Pasıentterdiń jaǵdaıy búgin tańerteń qanaǵattanarlyq boldy. Olardyń tarapynan aıtarlyqtaı shaǵym joq. Intoksıkasıa belgileri baıqalmaıdy, tynys alýlarynda kemshilik joq, dene qyzýlary shekti normada. Medısınalyq qadaǵalaý ınkýbasıalyq kezeń boıyna jalǵasady. Bul jerde jatqan pasıentterdiń basym bóligi koronavırýs ınfeksıasynyń taralý joǵary aımaqta bolǵan", - dedi dáriger.
Aýrýhanada jatqan pasıentterdiń biri jýrnalısermen áńgimelesýge kelisim berdi.
Onyń aıtýynsha, pasıentterdiń telefondary da ózge zattarmen birge óńdeý úshin alynǵan. Degemen aýrýhananyń stasıonarlyq telefony arqyly baılanysýǵa múmkindik bar.
"2016 jyldan Ýhan qalasynda boldym. 22 qańtarda qalada karantın jarıalanǵan kezde 100-den astam adam bolǵan edik. Men jáne taǵy eki stýdent evakýasıalaý boıynsha operasıany úılestirýge kómek berdik. Evakýasıalaý josparyn bir apta boıy daıyndadyq. Sebebi naqty sheshim bolǵan joq. Sońǵy ýaqytqa deıin Qytaı ózge elderge áýe keńistigin paıdalanýǵa ruqsat bermedi", - dedi Ýhannan kelgen qazaqstandyq stýdent.
Ol aýrýhanada jatqan adamdardyń týǵan-týystaryna alańdamaýdy ótinip, barlyǵynyń jaǵdaıy jaqsy ekendigin aıtty.
"Uzaq ýaqyt Qytaıda bolǵan balalar óz nómirlerin tirkep úlgermedi jáne Qazaqstanǵa kelgennen keıin olardyń nómiri óship tur. Olardyń ata-analary evakýasıalaý josparyna saı Qazaqstanǵa kelgenimizdi biledi. Biraq, kim qaı palatada ekenin bilmeımiz", - dedi stýdent qyz.
Sóz sońynda ol qoldaý kórsetken otandastaryna rızashylyǵyn bildirdi,.
"Qurmetti Qazaqstan halqy! Biz barlyǵymyz Otanymyzǵa oraldyq jáne dárigerlerdiń turaqty baqylaýyndamyz. Bizde bári jaqsy. shyn nıetimin biz úshin alańdaýshylyq tanytqan barlyǵyńyzǵa úlken rahmet", - dedi ol.
