Kúrshim aýdanyna josparlanǵan saparyn keiinge shegergen óńir basshysy shekaradaǵy ahýalǵa alańdaǵan Zaisan aýdanynyń turǵyndarymen kezdesip, shekarany birde-bir sheteldik kesip ótpeitinin aitty.
"Qytaimen aradaǵy shekara jabyq. Barlyǵyńyzdy sabyrǵa shaqyramyn. Qytaidan kelgen bes adam óz azamatymyz. Stýdent jastar. Biz olardy shekarany ashpai, shettetip jibergenimiz durys bolar ma edi? Olar birden karantinge jabyldy, ózgelerden oqshaýlandy.
Olardyń deni saý, qaýipti indet juqtyrmaǵan. Qytaidan kelgen jerlesterimizdi shekarada meditsina mamandary jiti tekserýden ótkizedi. Eger dene qyzýy qalypty bolsa, tumaý men jóteli bolmasa bul azamattar elimizdiń Bas sanitarynyń buiryǵyna sai baqylaý bólmesine ornalasady. Dárigerler 14 kún boiyna olardyń jaǵdaiyn baqylaidy. Statsionardan shyqqannan keiin de taǵy 10 kún baqylaýda ustaidy. Eger Qytaidan kelgen azamatta qaýipti virýstyń belgileri baiqalsa birden infektsiialyq aýrýhanaǵa jatqyzady. Olar birden oqshaýlanady. Alańdamańyzdar. Virýstyń taralýyna jol bermeimiz.
Men bul araǵa 3 kúnnen keiin qaityp kelemin. Jaǵdai tikelei meniń baqylaýymda bolady", – dedi Danial Ahmetov.
Jergilikti jurt óz kezeginde: "Óz azamatymyz bolsa qarsy emespiz, tek sheteldikterdi kirgizbeńizder", – degen talap qoidy.
Aita ketelik áleýmettik jelide "qaýipti indet juqtyrǵan qytai azamattary Zaisanǵa jetkizilip, jergilikti aýrýhanaǵa jatqyzyldy" degen qaýeset tarap ketti. Muny estigen Sarterek jáne Ainabulaq aýylynyń halqy kóshege shyǵyp, jergilikti ákimdikten mán-jaidy túsindirýdi jáne shekarany jabýdy talap etken.
Bul málimetti oblys ákimdigi joqqa shyǵardy.
"Zaisan aýdanyndaǵy aýrýhanalarǵa koronavirýs juqtyrǵan Qytai azamattary jatqyzyldy degen aqparat jalǵan. Oblys ákimi Danial Ahmetov jurtty tynyshtandyrý úshin Zaisanǵa keldi. Shyndyqqa sáikes kelmeitin málimetterdi taratqandar qylmystyq jaýapqa tartylatynyn eske salamyz", - deidi oblys ákiminiń baspasóz qyzmeti.
Keshe óńir jurtshylyǵyna esep bergen Danial Ahmetov óńirde koronavirýstyń taralýyna jol bermeý úshin jedel shtab qurylǵanyn aitqan.
Esep berý kezinde Zaisan aýdanynyń turǵyny Baqyt Syrbaeva shekaradaǵy jurt Qytaida taraǵan qaýipti virýstan qorqyp otyrǵanyn jetkizgen edi.
Ahmetov búgingi tańda jaǵdaidyń qatań baqylaýda ekenin aityp, halyqty sabyrǵa shaqyrdy.
"Elimizde bul infektsiiany juqtyrǵan eshkim joq. 17 aqpannan bastap Qytaidan kelgen árbir azamat 2 aptaǵa observatsiialyq baqylaýǵa jatqyzylady. Óńirdiń meditsinalyq mekemelerinde koronavirýsqa qarsy preparattar qory jetkilikti. Barshańyzdy úreilenbeýge shaqyramyn. Jaǵdai qatań baqylaýda", - dedi Danial Kenjetaiuly.
Shyǵys Qazaqstan oblysy Densaýlyq saqtaý basqarmasynyń málimetinshe Semei jáne Óskemen qalasynda fiziopýlmonogiialyq statsionarlarda 110 tósek-oryn daiyn tur. Qajet bolǵan jaǵdaida Shemonaiha aýdanynyń "Úlbi" emdik-saýyqtyrý kesheninde 250 orynǵa, Tarbaǵatai aýdany Aqjar aýylynyń týberkýlezge qarsy dispanserinde 100 orynǵa jáne Altai aýdany "Grehovo" emdik kesheninde 80 orynǵa arnalǵan observatsiialyq statsionarlar ázirlenedi.
Oblys boiynsha qaýipti indet taraǵan jaǵdaida 1023 infektsiialyq tósek-oryn ázir tur. Meditsinalyq uiymdarda betperde, meditsinalyq qolǵap, qorǵanys kástúmderi men dári-dármek jetkilikti.
https://youtu.be/xvCq-J9bhnI
