كۇرشىم اۋدانىنا جوسپارلانعان ساپارىن كەيىنگە شەگەرگەن ءوڭىر باسشىسى شەكاراداعى احۋالعا الاڭداعان زايسان اۋدانىنىڭ تۇرعىندارىمەن كەزدەسىپ، شەكارانى بىردە-بىر شەتەلدىك كەسىپ وتپەيتىنىن ايتتى.
"قىتايمەن اراداعى شەكارا جابىق. بارلىعىڭىزدى سابىرعا شاقىرامىن. قىتايدان كەلگەن بەس ادام ءوز ازاماتىمىز. ستۋدەنت جاستار. ءبىز ولاردى شەكارانى اشپاي، شەتتەتىپ جىبەرگەنىمىز دۇرىس بولار ما ەدى؟ ولار بىردەن كارانتينگە جابىلدى، وزگەلەردەن وقشاۋلاندى.
ولاردىڭ دەنى ساۋ، ءقاۋىپتى ىندەت جۇقتىرماعان. قىتايدان كەلگەن جەرلەستەرىمىزدى شەكارادا مەديسينا ماماندارى ءجىتى تەكسەرۋدەن وتكىزەدى. ەگەر دەنە قىزۋى قالىپتى بولسا، تۇماۋ مەن جوتەلى بولماسا بۇل ازاماتتار ەلىمىزدىڭ باس سانيتارىنىڭ بۇيرىعىنا ساي باقىلاۋ بولمەسىنە ورنالاسادى. دارىگەرلەر 14 كۇن بويىنا ولاردىڭ جاعدايىن باقىلايدى. ستاسيوناردان شىققاننان كەيىن دە تاعى 10 كۇن باقىلاۋدا ۇستايدى. ەگەر قىتايدان كەلگەن ازاماتتا ءقاۋىپتى ۆيرۋستىڭ بەلگىلەرى بايقالسا بىردەن ينفەكسيالىق اۋرۋحاناعا جاتقىزادى. ولار بىردەن وقشاۋلانادى. الاڭداماڭىزدار. ۆيرۋستىڭ تارالۋىنا جول بەرمەيمىز.
مەن بۇل اراعا 3 كۇننەن كەيىن قايتىپ كەلەمىن. جاعداي تىكەلەي مەنىڭ باقىلاۋىمدا بولادى"، – دەدى دانيال احمەتوۆ.
جەرگىلىكتى جۇرت ءوز كەزەگىندە: "ءوز ازاماتىمىز بولسا قارسى ەمەسپىز، تەك شەتەلدىكتەردى كىرگىزبەڭىزدەر"، – دەگەن تالاپ قويدى.
ايتا كەتەلىك الەۋمەتتىك جەلىدە "ءقاۋىپتى ىندەت جۇقتىرعان جۇڭگو ازاماتتارى زايسانعا جەتكىزىلىپ، جەرگىلىكتى اۋرۋحاناعا جاتقىزىلدى" دەگەن قاۋەسەت تاراپ كەتتى. مۇنى ەستىگەن سارتەرەك جانە اينابۇلاق اۋىلىنىڭ حالقى كوشەگە شىعىپ، جەرگىلىكتى اكىمدىكتەن ءمان-جايدى ءتۇسىندىرۋدى جانە شەكارانى جابۋدى تالاپ ەتكەن.
بۇل مالىمەتتى وبلىس اكىمدىگى جوققا شىعاردى.
"زايسان اۋدانىنداعى اۋرۋحانالارعا كوروناۆيرۋس جۇقتىرعان جۇڭگو ازاماتتارى جاتقىزىلدى دەگەن اقپارات جالعان. وبلىس اكىمى دانيال احمەتوۆ جۇرتتى تىنىشتاندىرۋ ءۇشىن زايسانعا كەلدى. شىندىققا سايكەس كەلمەيتىن مالىمەتتەردى تاراتقاندار قىلمىستىق جاۋاپقا تارتىلاتىنىن ەسكە سالامىز"، - دەيدى وبلىس اكىمىنىڭ باسپا ءسوز قىزمەتى.
كەشە ءوڭىر جۇرتشىلىعىنا ەسەپ بەرگەن دانيال احمەتوۆ وڭىردە كوروناۆيرۋستىڭ تارالۋىنا جول بەرمەۋ ءۇشىن جەدەل شتاب قۇرىلعانىن ايتقان.
ەسەپ بەرۋ كەزىندە زايسان اۋدانىنىڭ تۇرعىنى باقىت سىربايەۆا شەكاراداعى جۇرت قىتايدا تاراعان ءقاۋىپتى ۆيرۋستان قورقىپ وتىرعانىن جەتكىزگەن ەدى.
احمەتوۆ بۇگىنگى تاڭدا جاعدايدىڭ قاتاڭ باقىلاۋدا ەكەنىن ايتىپ، حالىقتى سابىرعا شاقىردى.
"ەلىمىزدە بۇل ينفەكسيانى جۇقتىرعان ەشكىم جوق. 17 اقپاننان باستاپ قىتايدان كەلگەن ءاربىر ازامات 2 اپتاعا وبسەرۆاسيالىق باقىلاۋعا جاتقىزىلادى. ءوڭىردىڭ مەديسينالىق مەكەمەلەرىندە كوروناۆيرۋسقا قارسى پرەپاراتتار قورى جەتكىلىكتى. بارشاڭىزدى ۇرەيلەنبەۋگە شاقىرامىن. جاعداي قاتاڭ باقىلاۋدا"، - دەدى دانيال كەنجەتاي ۇلى.
شىعىس قازاقستان وبلىسى دەنساۋلىق ساقتاۋ باسقارماسىنىڭ مالىمەتىنشە سەمەي جانە وسكەمەن قالاسىندا فيزيوپۋلمونوگيالىق ستاسيونارلاردا 110 توسەك-ورىن دايىن تۇر. قاجەت بولعان جاعدايدا شەمونايحا اۋدانىنىڭ "ءۇلبى" ەمدىك-ساۋىقتىرۋ كەشەنىندە 250 ورىنعا، تارباعاتاي اۋدانى اقجار اۋىلىنىڭ تۋبەركۋلەزگە قارسى ديسپانسەرىندە 100 ورىنعا جانە التاي اۋدانى "گرەحوۆو" ەمدىك كەشەنىندە 80 ورىنعا ارنالعان وبسەرۆاسيالىق ستاسيونارلار ازىرلەنەدى.
وبلىس بويىنشا ءقاۋىپتى ىندەت تاراعان جاعدايدا 1023 ينفەكسيالىق توسەك-ورىن ءازىر تۇر. مەديسينالىق ۇيىمداردا بەتپەردە، مەديسينالىق قولعاپ، قورعانىس كاستۇمدەرى مەن دارى-دارمەك جەتكىلىكتى.
https://youtu.be/xvCq-J9bhnI
