Búgin oblys ákimdiginde ótken jıynda oblystyq Tótenshe jaǵdaılar departamenti bastyǵynyń orynbasary Qanat Ábdilov sý tasqyny qaýpi bar eldi mekenderdegi daıyndyq jumystary týraly baıandady.
«Óńirdegi qar qory ortasha jyldyq normadan 50% joǵary. Osyǵan oraı, oblysta arnaıy shtab quryldy. 108 eldi mekendi sý basýy múmkin. Sý tasqynyna qarsy sharalardan bastap adamdardy evakýasıalaýǵa deıin bári oılastyrylǵan. Qardyń erýine ǵaryshtyq monıtorıń júrgizilýde. Tehnıkalardyń barlyǵy saqadaı saı daıyn tur», - dedi ol.
Onyń aıtýynsha, osydan birneshe kún buryn Óskemende ótken «Kóktem-2020» sharasynda jeke quramnan 95 adam arnaıy jattyǵýdan ótken. Tótenshe jaǵdaı bolyp jatsa 290 motopompa men 1200-den astam arnaıy tehnıka ázir.
Bul rette, SHQO ákimi Danıal Ahmetov qosymsha tehnıkalar alýdy tapsyrdy.
«Sý basý qaýpi bar eldi mekenderdiń árqaısysy úshin naqty is-sharalar jospary daıyndaldy. Osyǵan sáıkes, tótenshe jaǵdaılar kezinde oryndalatyn barlyq jumystar qarastyrylǵan. Alaıda munymen toqtap qalmaı, qosymsha motopompa men tehnıkalar alý kerek», - dedi D.Ahmetov.
