Danial Ahmetov: «Bes jylǵy eńbek – biyl bir million sharshy metr úi salamyz»
– 2021 jyl – biz úshin este qalarlyq jyl boldy. Óitkeni, biyl biz bir million sharshy metr turǵyn úi salý mejesin baǵyndyrdyq. Bul nátijege jetý úshin bes jyl tynbai eńbek etýge týra keldi. Búgingi tańda oblysta túrli qarjy kózderinen 127 kóppáterli turǵyn úi salynyp jatyr. 381 úidiń qurylysy «Bir qabatty Shyǵys» baǵdarlamasy boiynsha júrgizilýde, – dep atap ótti D.Ahmetov.
Aimaq basshysy kommertsiialyq turǵyn úi sektoryna nazar aýdarý qajettigin aitty. Óitkeni, bul suranysqa ie jáne oblys halqy baspana satyp alý úshin qarjy salýǵa daiyn.
– Qurylys, ásirese turǵyn úi qurylysy aimaqtyń tabysty áleýmettik-ekonomikalyq damýynyń jáne oblys turǵyndary ál-aýqatynyń jaqsarǵanyn baiqatatyn úzdik kórsetkishterdiń biri ekenin aita ketý kerek. Biz buryn-sońdy bolmaǵan qadamǵa barýǵa daiynbyz. Máselen, áleýetti jeke investorlarǵa jer ýchaskelerin ǵana emes, qurylysyn dál qazir bastaýǵa daiyn jobalardy da usyna alamyz, – dedi aimaq basshysy.
Osyǵan bailanysty ákim Qurylys basqarmasyna, barlyq qalalar men aýdandardyń ákimderine turǵyn úi qurylysynyń esebin kórsetýdi tapsyrdy.
«Bir qabatty Shyǵys» baǵdarlamasy boiynsha salynatyn úilerge qatysty aitqan Danial Ahmetov Óskemen, Ridder jáne Tarbaǵatai aýdanynda áli kúnge deiin qurylys jumystaryn bastamaǵan merdigerlerdiń máselesin jáne olarmen jasalǵan sharttardy qaita qaraý kerektigin tapsyrdy.
– Jobanyń qunyn ulǵaitý úshin túzetý engizýdi suraityndardy erekshe qadaǵalaý qajet. Shynymen qurylys materialdarynyń qymbattaýyna bailanysty ma, álde basqa maqsatty kózdep otyr ma, osy máseleni muqiiat tekserý kerek, – dedi ShQO ákimi.
Budan bólek, oblys ákimi ShQO-nyń barlyq aýdanynda sporttyq saýyqtyrý keshenderi, sport modýlderi, basseinder, mádeniet úileri men klýbtar, feldsherlik-akýsherlik pýnktter siiaqty áleýmettik, mádeni jáne sport nysandary salynyp jatqanyn tilge tiek etti.
Qurylys kestege sáikes júrip jatyr. Sondai-aq, Óskemende biregei gematologiialyq ortalyqtyń qurylysy jalǵasýda. Bul joba erekshe baqylaýda bolady.
