Búgin Túrkistan oblysy, Túlkibas aýdany, Shaqpaq baba aýylynyń mańynda ornalasqan halyqaralyq mańyzy bar avtojol tonneli el igiligige paidadanýǵa berildi. Saltanatty sharaǵa QR Kólik vitse-ministri Ablaliev Sátjan, Túrkistan oblysy ákiminiń birinshi orynbasary Zulpyhar Joldasov, Jambyl oblysy ákimniń orynbasary Qanatbek Mádibek, sala mamandary men eki oblystyń aqsaqaldary qatysty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Mańyzdy nysannyń ashylý saltanatynda alǵysóz alǵan Kólik vitse-ministri turǵyndardy qýanyshymen quttyqtap, salada atqarylyp jatqan jumystardy aityp ótti.
– Bul – Qazaqstannyń kólik infraqurylymy úshin mańyzdy oqiǵa. Elimizdegi alǵashqy tonnel. Búgin ashylǵannan keiin negizgi kólik aǵyny Shaqpaq Baba eldi-mekeniniń ainalma jolyna baǵyttaldy. Bul eldi mekenniń ishindegi jol qaýipsizdigin arttyrýǵa septigin tigizbek. Sonymen qatar nysan qysta júrgizýshilerdiń Shaqpaq baba asýynda qar qursaýynda qalyp qoimaýyna múmkindik beredi, – degen Sátjan Ablaliev jol paidalanýshylaryna jaily jáne qaýipsiz jol tiledi.
Basqosýda Túrkistan oblysy ákiminiń birinshi orynbasary Zulpyhar Joldasov quttyqtaý sóz alyp, nysannyń mańyzdylyǵyna toqtaldy.
– Búgin biz elimizdegi eń mańyzdy ári qurylysy kúrdeli nysandy tapsyrǵaly turmyz. Túrkistan oblysy men Jambyl oblysyn bailanystyratyn avtojol tonneli respýblikadaǵy kólemi boiynsha eń uzyn tonnel ekendigin atap ótkim keledi. Memleket basshysy Qasym-Jomart Kemeluly Qazaqstan halqyna Joldaýynda elimiz Aziia men Eýropany qosatyn álemdik mańyzy bar kólik-tasymal torabyna ainalý qajettigin atap ótti. Búgingi tańda bul baǵyttaǵy jumystar artqarylýda. Bul nysandy paidalanýǵa berý arqyly jol qozǵalysynyń qaýipsizdigi qamtamasyz etiledi jáne óńirdegi jolaýshylar aǵyny men júk ainalymy artyp, týrizmniń damýyna áserin tigizedi, – dedi Zulpyhar Joldasov.
Bul qurylys – elimizdegi avtomobil joldary salasyndaǵy biregei joba. Túrkistan oblysy, Shaqpaq Baba asýyndaǵy eki jolaqty tonneldiń uzyndyǵy 840 metrdi quraidy. Eni – 11 metr, biiktigi – 8 metr.
Qaýipsizdikti qamtamasyz etý maqsatynda tonneldiń eki jaǵynda jaryqtandyrý, jeldetý, dabyl berý jáne baǵdarshamdardy retteý úderisterin basqaratyn dispetcherlik pýnktter qarastyrylǵan. Sonymen qatar naqty ýaqyt rejiminde tonneldi baqylaýǵa múmkindik beretin beinebaqylaý jáne órtten qorǵaý júieleri ornatylǵan. Tonneldiń janynda júrgizýshiler men jolaýshylar úshin jol jóndeý pýnkti, janarmai quiý beketi, tikushaq alańdary jáne saýda aimaqtary qarastyrylǵan.
Avtojol tonneliniń ashylýy qarsańynda 100 adam jáne 15 birlik arnaiy tehnika jumyldyryp, arnaiy oqý-jattyǵýlary ótkendigin atap ótken jón. Arnaiy jattyǵýlar sheńberinde tonneldiń qaýipsizdik júieleri, sonyń ishinde jeldetý jáne órt sóndirý jumystary synaldy. Sondai-aq tótenshe jaǵdai kezinde kólik quraldaryn jedel súireý jáne jol-paidalaný tehnikasynyń qozǵalysyn uiymdastyrý boiynsha is-áreketter pysyqtaldy.
Is-shara barysynda Kólik vitse-ministri Ablaliev Sátjan osy salanyń damýyna eleýli úles qosyp, aianbai eńbek etip júrgen bir top azamatqa tósbelgi taǵyp, Alǵys hattarmen marapattady.
Jol qozǵalysna nusqaýlyq berilgennen keiin, tonnelden avtosherý júrip ótti. Qurylys jumystarynyń sapasy Ulttyq sapa ortalyǵynyń turaqty baqylaýynda boldy
Aita keteiik, oblysta 2024 jyly avtomobil joldary salasyn damytýǵa respýblikalyq jáne oblystyq biýdjetten 41,4 mlrd teńge bólinip, qurylys-jóndeý jumystarymen jalpy 1061,3 shaqyrymdy quraityn joldar men kósheler qamtyldy. Jyl qorytyndysymen 559,6 shaqyrym jol paidalanýǵa beriledi dep kózdelýde.
