Tótenshe jaǵdailar vitse-ministri Baýyrjan Syzdyqov Batys Qazaqstan oblysynda sý tasqynyna qarsy is-sharalar kezinde jaraqat alǵan qutqarýshynyń jaǵdaiyna bailanysty málimdeme jasady, dep habarlaidy Dalanews.kz.
Ministr bul jaǵdaidyń týyndaýyna jergilikti turǵyndardyń áreketi sebep bolǵanyn jetkizdi.
"Ókinishke qarai, qutqarýshylarymyz kómekke kelgende, halyq arasynan arqadan pyshaq suǵatyndar shyqty. Oqiǵa Batys Qazaqstan oblysynda bolǵan. Qutqarýshylar ózen jaǵasynda adamdardy bir jaǵadan ekinshi jaǵaǵa ótkizip turǵan. Olarǵa eki jergilikti turǵyn kelip, tiise bastaǵan. Aqyrynda kikiljińdi sheship, qutqarýshylardan: “Qashanǵa deiin bolasyńdar?” dep suraǵan. Olar “Biz táýlik boiy osyndamyz” dep jaýap bergen. Budan soń keshke mas bolyp kelgen eki jergilikti turǵyn tóbeles shyǵarǵan. Sol kezde qutqarýshylardyń birine pyshaq tyǵyp alǵan", - dedi vitse-ministr.
Al naýqas dárigerlerdiń baqylaýynda, jaǵdaiy birqalypty eken.
"Dárigerler jaqsy nátije kútedi. Zań buzýshylar ustaldy, olar óz kinálaryn moiyndady. Qazir politsiianyń qaramaǵynda", - dedi Syzdyqov.
Eske salaiyq, kúni keshe TJM BQO-da turǵyndarǵa kómektesýge barǵan qutqarýshyny pyshaqtap ketkenin habarlaǵan bolatyn. Ministrlik málimetinshe, qutqarýshy 26 jasta. Oqiǵa Kaztalov aýdany Jalpaqtal aýylynyń mańynda bolǵan.
Jedel derekter boiynsha, jergilikti turǵyndarǵa kómek kórsetý boiynsha sý tasqynyna qarsy is-sharalardy ótkizý barysynda Qaraózen ózeniniń jaǵasynda 1998 jyly týǵan azamattyq qorǵaý serjanty jaralandy. Ol aýdandyq aýrýhanaǵa keýde aimaǵynda eki pyshaq jaraqatymen jetkizildi. Politsiianyń málimetinshe, shabýyldaýshy ishimdik ishken kúiinde bolǵan. Sotqa deiingi tergeý bastaldy.
