توتەنشە جاعدايلار ۆيسە-مينيسترى باۋىرجان سىزدىقوۆ باتىس قازاقستان وبلىسىندا سۋ تاسقىنىنا قارسى ءىس-شارالار كەزىندە جاراقات العان قۇتقارۋشىنىڭ جاعدايىنا بايلانىستى مالىمدەمە جاسادى، دەپ حابارلايدى Dalanews.kz.
مينيستر بۇل جاعدايدىڭ تۋىنداۋىنا جەرگىلىكتى تۇرعىنداردىڭ ارەكەتى سەبەپ بولعانىن جەتكىزدى.
"وكىنىشكە قاراي، قۇتقارۋشىلارىمىز كومەككە كەلگەندە، حالىق اراسىنان ارقادان پىشاق سۇعاتىندار شىقتى. وقيعا باتىس قازاقستان وبلىسىندا بولعان. قۇتقارۋشىلار وزەن جاعاسىندا ادامداردى ءبىر جاعادان ەكىنشى جاعاعا وتكىزىپ تۇرعان. ولارعا ەكى جەرگىلىكتى تۇرعىن كەلىپ، تيىسە باستاعان. اقىرىندا كيكىلجىڭدى شەشىپ، قۇتقارۋشىلاردان: “قاشانعا دەيىن بولاسىڭدار؟” دەپ سۇراعان. ولار “ءبىز تاۋلىك بويى وسىندامىز” دەپ جاۋاپ بەرگەن. بۇدان سوڭ كەشكە ماس بولىپ كەلگەن ەكى جەرگىلىكتى تۇرعىن توبەلەس شىعارعان. سول كەزدە قۇتقارۋشىلاردىڭ بىرىنە پىشاق تىعىپ العان"، - دەدى ۆيسە-مينيستر.
ال ناۋقاس دارىگەرلەردىڭ باقىلاۋىندا، جاعدايى ءبىرقالىپتى ەكەن.
"دارىگەرلەر جاقسى ناتيجە كۇتەدى. زاڭ بۇزۋشىلار ۇستالدى، ولار ءوز كىنالارىن مويىندادى. ءقازىر پوليسيانىڭ قاراماعىندا"، - دەدى سىزدىقوۆ.
ەسكە سالايىق، كۇنى كەشە تجم بقو-دا تۇرعىندارعا كومەكتەسۋگە بارعان قۇتقارۋشىنى پىشاقتاپ كەتكەنىن حابارلاعان بولاتىن. مينيسترلىك مالىمەتىنشە، قۇتقارۋشى 26 جاستا. وقيعا كازتالوۆ اۋدانى جالپاقتال اۋىلىنىڭ ماڭىندا بولعان.
جەدەل دەرەكتەر بويىنشا، جەرگىلىكتى تۇرعىندارعا كومەك كورسەتۋ بويىنشا سۋ تاسقىنىنا قارسى ءىس-شارالاردى وتكىزۋ بارىسىندا قاراوزەن وزەنىنىڭ جاعاسىندا 1998 جىلى تۋعان ازاماتتىق قورعاۋ سەرجانتى جارالاندى. ول اۋداندىق اۋرۋحاناعا كەۋدە ايماعىندا ەكى پىشاق جاراقاتىمەن جەتكىزىلدى. پوليسيانىڭ مالىمەتىنشە، شابۋىلداۋشى ىشىمدىك ىشكەن كۇيىندە بولعان. سوتقا دەيىنگى تەرگەۋ باستالدى.
