Áleýmettik jelide Taraz qalasynyń jańa ákimi Baqytjan Orynbekovtiń birneshe kásibi bar ekeni týraly aqparat tarady. Qyzmetke taǵaıyndalǵanyna jarty aı bolǵan Orynbekov bul suraqqa ózi jaýap berdi, – dep habarlaıdy Halyq Uni.

Qala ákimi BAQ ókilderimen kezdesip, buǵan deıin bıznespen aınalysqanyn aıtty. Alaıda barlyq bıznesin inisine tapsyrǵan.

– 2004 jylǵa deıin bıznespen aınalysqanym ras. Alaıda sol jyly barlyq kásibimdi inime tapsyrdym. Taraz qalasynda bıznespen aınalyspadym. Memlekettik holdıńte qyzmet ettim. Otbasymnyń barlyq múshesi bıznespen aınalysady. Eskerte ketetin jaıt, olardyń eshqaısysy memlekettik mekemede jumys istemeıdi. Qazir meniń eshqandaı bızneske qatysym joq, – dedi Taraz qalasynyń ákimi Baqytjan Orynbekov.

Orynbekovtiń aıtýynsha, otbasynyń iri qalalarda bıznesi bar.

– «Atrıým», «Toıqazan», «Chao kakao» meıramhanalary meniń otbasymdaǵy adamdarǵa tıesili, kompanıa da otbasy múshelerine tıesili. Sonymen qatar otbasymyzǵa tıesili Astanada, Almatyda, Tarazda múlik bar. Meniń jaqyndarym –  adal bıznesmender, – dedi qala ákimi.

Ol sondaı-aq Tarazdy damytýda jarnamaǵa emes, júıeli jumysqa basymdyq beretinin aıtty.

Aıta keteıik, 5 qyrkúıekte Baqytjan Orynbekov Taraz qalasynyń ákimi bolyp taǵaıyndaldy.