قالا ەكٸمٸ باق ٶكٸلدەرٸمەن كەزدەسٸپ, بۇعان دەيٸن بيزنەسپەن اينالىسقانىن ايتتى. الايدا بارلىق بيزنەسٸن ٸنٸسٸنە تاپسىرعان.
– 2004 جىلعا دەيٸن بيزنەسپەن اينالىسقانىم راس. الايدا سول جىلى بارلىق كەسٸبٸمدٸ ٸنٸمە تاپسىردىم. تاراز قالاسىندا بيزنەسپەن اينالىسپادىم. مەملەكەتتٸك حولدينگتە قىزمەت ەتتٸم. وتباسىمنىڭ بارلىق مٷشەسٸ بيزنەسپەن اينالىسادى. ەسكەرتە كەتەتٸن جايت, ولاردىڭ ەشقايسىسى مەملەكەتتٸك مەكەمەدە جۇمىس ٸستەمەيدٸ. قازٸر مەنٸڭ ەشقانداي بيزنەسكە قاتىسىم جوق, – دەدٸ تاراز قالاسىنىڭ ەكٸمٸ باقىتجان ورىنبەكوۆ.
ورىنبەكوۆتٸڭ ايتۋىنشا, وتباسىنىڭ ٸرٸ قالالاردا بيزنەسٸ بار.
– «اتريۋم», «تويقازان», «چاو كاكاو» مەيرامحانالارى مەنٸڭ وتباسىمداعى ادامدارعا تيەسٸلٸ, كومپانييا دا وتباسى مٷشەلەرٸنە تيەسٸلٸ. سونىمەن قاتار وتباسىمىزعا تيەسٸلٸ استانادا, الماتىدا, تارازدا مٷلٸك بار. مەنٸڭ جاقىندارىم – ادال بيزنەسمەندەر, – دەدٸ قالا ەكٸمٸ.
ول سونداي-اق تارازدى دامىتۋدا جارناماعا ەمەس, جٷيەلٸ جۇمىسقا باسىمدىق بەرەتٸنٸن ايتتى.
ايتا كەتەيٸك, 5 قىركٷيەكتە باقىتجان ورىنبەكوۆ تاراز قالاسىنىڭ ەكٸمٸ بولىپ تاعايىندالدى.
