Kásipker Gúlbaný Maiǵarina jeńildetilgen salyq rejimi boiynsha bizneske túsip otyrǵan júktemege qatysty pikir bildirdi, dep habarlaidy Dalanews.kz.
Onyń aitýynsha, qoldanystaǵy júie boiynsha kásipkerler aldymen salyq tólep, sodan keiin ǵana taza paidaǵa qol jetkizedi.
"Jeńildetilgen salyq rejiminde biz áýeli salyqty tóleimiz, sodan keiin ǵana taza tabysymyz qalady. Júie dál osylai jumys isteidi. Búgin tabysymyz bar ma, joq pa - soǵan qaramastan, biz salyq tóleýge mindettimiz", - dedi ol.
Osyǵan bailanysty Maiǵarina ýákiletti organdardy Salyq kodeksindegi ózgeristerge muqiiat qaraýǵa shaqyrdy.
"Sondyqtan barshaǵa úlken ótinish - Salyq kodeksinde bolyp jatqannyń bárin qaita qarap shyǵý qajet", - dep atap ótti kásipker.
Sonymen qatar ol kásipkerlerdiń ózderine de úndeý jasady. Maiǵarinanyń aitýynsha, qazirgi jaǵdaida biznesti emotsiiamen emes, naqty esep pen derekke súienip júrgizý asa mańyzdy.
"Ekinshi úlken ótinishim - bizdiń kásipkerlerge, biznes ókilderine. Shynymen otyryp, júieli, durys biznes qurý kerek. Negizgi, myqty sheshimderdi de, marketingke, kadr qabyldaýǵa qatysty sheshimderdi de tek tsifrlarǵa súienip qabyldaý qajet. Búgin emotsiiaǵa oryn joq. Áitpese shaǵyn jáne orta biznes úshin quldyraý sózsiz", - dedi ol.
Kásipkerdiń aitýynsha, kadr qysqartý úrdisi qazirdiń ózinde baiqalyp otyr.
"Iá, búgin bizdiń jeliniń ózinde qyzmetker shamamen 25 paiyzǵa qysqardy. Bul tek bizdegi ǵana jaǵdai emes. Men bulai dep oilamaimyn, men muny naqty bilemin - dál osy salada jumys istep otyrǵan kásipkerlerdiń barlyǵynda derlik jaǵdai osy", - dep túiindedi Gúlbaný Maiǵarina.
