Kúni keshe Prezidenttiń aitqandaryna qatysty ekonomist Asqar Qysyqov óz oiymen bólisti. Onyń aitýynsha, bárin únemdep, ońtailandyrylǵan aqshanyń bar potentsialy ekonomikamyzdyń naqty sektoryn jáne túrli investitsiialyq jobalardy qarjylandyrýdyń artynda "sińip joq" bolady. Mysaly, myna jaqtan Úkimet salyqtardy ósirý máselesin talqylap jatsa, taǵy bir jaqta qomaqty qarajatty talap etetin ekonomika salalaryn qoldaýdyń jańa baǵdarlamalaryn usynyp jatady. Máselen, sonyń ishinde "Báiterek" holdingi arqyly shamamen 8 trln teńge bólý jaiy qarastyrylǵan, dep habarlaidy Dalanews.kz.
Inbusiness.kz portalyna bergen suqbatynda Asqar Qysyqov kóp qarjy bólý qarastyrylatyn Energetika jáne kommýnaldyq sektorlardy jańǵyrtýdyń ulttyq jobasy da qabyldanǵanyn basa aitady. Onyń aitýynsha, bul da óte úlken aqsha, osy esep-qisapty, osy jobalardy da muqiiat qaraý kerek.
"Eger biz infraqurylymdy damytý jaiyn sóz etetin bolsaq jáne bul naryqtyq tarifterge kóshýdi kúitteitin biz júzege asyryp jatqan tariftik saiasatqa tikelei bailanysty bolsa, onda infraqurylymdar, ásirese energetika men kommýnaldyq sharýashylyqtaǵysy óz shyǵyn ózi aqtaýǵa qabiletti. Iaǵni, energetikalyq jáne kommýnaldyq sektordy damytýǵa salynǵan investitsiialar qaitarymdy bolýy tiis. Eger olar qaitarymdy jáne ótemdi bolady dep boljansa, onda bul úshin memlekettiń emes, jeke investitsiialardy tartýǵa bolady. Memleket jeke sektor qarjylandyrýǵa qabiletti jobalarǵa aqsha jumsamaý tártibine kóshýi kerek. Osy jaǵynan alǵanda, ekonomikany jáne keibir basym salalardy memlekettiń aqshasymen "azyqtandyrý" ádetin qoiý kerek, óitkeni biýdjettiń negizgi maqsaty memlekettiń negizgi fýnktsiialaryn oryndaý bolýy kerek: qaýipsizdik, qorǵanys, bilim berý, meditsina, halyqty áleýmettik qoldaý jáne jeke sektor qarjylandyra almaityn mańyzdy infraqurylymdyq jobalar, joldar, kópirler jáne t.b. qoǵamdyq igilikteri degendei", - deidi sarapshy.
