Salyq júktemesi artqan jaǵdaida shaǵyn biznes ókilderi jarnamaǵa artyq qarjy jumsamai-aq klient tartýdyń tiimdi joldaryn izdei bastaidy. Media naryǵynda da soǵan bailanysty mańyzdy úrdis baiqalady. BAQ-ta jariialanǵan materialdar kei jaǵdaida basqa marketing quraldarymen salystyrǵanda áldeqaida kóp aýditoriia tartyp, joǵary trafik ákelýi múmkin.
Kásipkerlerdiń BAQ-qa jarnamaǵa qarjy jumsamai-aq qalai shyǵýyna bolatynyn Qazaq Expert Club uiymynyń media jáne PR salasyndaǵy sarapshysy Mira Halina túsindirdi, dep habarlaidy Dalanews.kz.
Onyń aitýynsha, shaǵyn biznes úshin BAQ-pen jumys isteý mańyzdy. Óitkeni búgingi kúni naryq jarnamaǵa tolyp ketken, al senim eń tapshy resýrsqa ainalyp otyr.
«BAQ-ta jariialaný tek qamtýdy arttyryp qana qoimai, bizneske senimdilik beredi. Nátijesinde kompaniiany tek klientter ǵana emes, seriktester, investorlar, bankter jáne kásibi qaýymdastyq ókilderi de baiqai bastaidy», – deidi Halina.
Sarapshynyń sózinshe, jarnama qysqa merzimde trafik pen konversiia ákelse, media kompaniianyń bedelin qalyptastyryp, brendtiń tanymaldylyǵyn arttyrady jáne onyń sarapshylyq deńgeiin kórsetedi.
Alaida BAQ-pen jumys isteý muqiiat tásildi talap etedi. Cision zertteýine sáikes, jýrnalisterdiń 86 paiyzy ózektiligi joq usynystardy qabyldamaidy. Al 78 paiyzy spam úshin jiberýshilerdi buǵattaýǵa daiyn. Sonymen qatar jýrnalisterdiń 62 paiyzy alǵashqy hattan keiin tek bir ǵana follow-up jiberýdi oryndy dep sanaidy. Uzaq hattar men sapasyz jasandy intellekt mátinderi de jariialaný múmkindigin aitarlyqtai tómendetedi.
Sarapshy jii kezdesetin qatelikterdiń biri retinde bir mátindi barlyq basylymǵa birdei jiberýdi atady.Sebebi media kóbine ekskliýziv materialdarǵa basymdyq beredi.
Sonymen qatar Halina mediaǵa óz biznesi týraly ǵana aitýǵa tyrysýdy eń úlken qate dep sanaidy.
«BAQ-ta tegin jariialanatyn materialdar kóbine biznes iesi naryq sarapshysy retinde sóilep, aýditoriiaǵa paidaly aqparat bergen kezde paida bolady. Mysaly, jergilikti trendter, klientterdiń minez-qulqyndaǵy ózgerister nemese saladaǵy jańa tájiribeler týraly pikirler media úshin qyzyqty», – deidi ol.
Sarapshynyń aitýynsha, kásipkerler aqparattyq sebepterdi ózderi de qalyptastyra alady. Máselen, klientter arasynda shaǵyn zertteý júrgizý, salalyq statistika jinaý nemese maýsymdyq trendter týraly pikir bildirý.
Mysal retinde ol alǵashqy jyldary jabylý qaýpinde turǵan qazaqstandyq IT-kompaniialardyń birin keltiredi. Keiinnen bul kompaniia óz segmentindegi jetekshi oiynshylardyń birine ainalǵan. Onyń negizin qalaýshy iskerlik mediaǵa IT naryǵynyń damýy týraly turaqty túrde pikir bildirip otyrǵan. Qazir kompaniianyń sheshimderin Qazaqstandaǵy orta jáne iri biznestiń shamamen 30 paiyzy qoldanady.
Osyndai tásildi azyq-túlik jetkizý qyzmetteriniń iri servisteriniń biri de paidalanǵan. Kompaniia media jariialanymdary arqyly logistikalyq tehnologiialar men elektrondyq kommertsiianyń damýy týraly aityp otyrǵan. Bul jariialylyq brendtiń tanymaldyǵyn arttyryp, investorlardyń nazaryn aýdarýǵa múmkindik bergen.
Bul rette alǵashqy nátijeler keide óte jyldam baiqalýy múmkin. Keibir jaǵdailarda material jariialanǵan kúni nemese kelesi kúni-aq alǵashqy suranystar túsedi.
«Degenmen medianyń keiinge qaldyrylǵan áseri de bar. Jariialanǵan maqala izdeý júieleri, qaita jariialanymdar jáne jańa klienttermen kelissózder arqyly birneshe apta, ai, tipti jyldar boiy jumys istei beredi. Ásirese material izdeý júielerine durys ońtailandyrylǵan bolsa», – deidi Halina.
Sarapshynyń aitýynsha, senim jariialanymdardyń kóptigimen emes, júielilik arqyly qalyptasady. Iaǵni relevantty mediada birinen keiin biri shyqqan birneshe material iri basylymdaǵy bir rettik jariialanymnan áldeqaida tiimdi bolýy múmkin.
Sondyqtan biznes úshin BAQ-pen jumys bir rettik PR-naýqan emes, naryqta uzaq merzimdi senim men bedel qalyptastyrý strategiiasyna ainalýy tiis.
