Салық жүктемесі артқан жағдайда шағын бизнес өкілдері жарнамаға артық қаржы жұмсамай-ақ клиент тартудың тиімді жолдарын іздей бастайды. Медиа нарығында да соған байланысты маңызды үрдіс байқалады. БАҚ-та жарияланған материалдар кей жағдайда басқа маркетинг құралдарымен салыстырғанда әлдеқайда көп аудитория тартып, жоғары трафик әкелуі мүмкін.

Кәсіпкерлердің БАҚ-қа жарнамаға қаржы жұмсамай-ақ қалай шығуына болатынын Qazaq Expert Club ұйымының медиа және PR саласындағы сарапшысы Мира Халина түсіндірді, деп хабарлайды Dalanews.kz.

Оның айтуынша, шағын бизнес үшін БАҚ-пен жұмыс істеу маңызды. Өйткені бүгінгі күні нарық жарнамаға толып кеткен, ал сенім ең тапшы ресурсқа айналып отыр.

«БАҚ-та жариялану тек қамтуды арттырып қана қоймай, бизнеске сенімділік береді. Нәтижесінде компанияны тек клиенттер ғана емес, серіктестер, инвесторлар, банктер және кәсіби қауымдастық өкілдері де байқай бастайды», – дейді Халина.

Сарапшының сөзінше, жарнама қысқа мерзімде трафик пен конверсия әкелсе, медиа компанияның беделін қалыптастырып, брендтің танымалдылығын арттырады және оның сарапшылық деңгейін көрсетеді.

Алайда БАҚ-пен жұмыс істеу мұқият тәсілді талап етеді. Cision зерттеуіне сәйкес, журналистердің 86 пайызы өзектілігі жоқ ұсыныстарды қабылдамайды. Ал 78 пайызы спам үшін жіберушілерді бұғаттауға дайын. Сонымен қатар журналистердің 62 пайызы алғашқы хаттан кейін тек бір ғана follow-up жіберуді орынды деп санайды. Ұзақ хаттар мен сапасыз жасанды интеллект мәтіндері де жариялану мүмкіндігін айтарлықтай төмендетеді.

Сарапшы жиі кездесетін қателіктердің бірі ретінде бір мәтінді барлық басылымға бірдей жіберуді атады.Себебі медиа көбіне эксклюзив материалдарға басымдық береді.

Сонымен қатар Халина медиаға өз бизнесі туралы ғана айтуға тырысуды ең үлкен қате деп санайды.

«БАҚ-та тегін жарияланатын материалдар көбіне бизнес иесі нарық сарапшысы ретінде сөйлеп, аудиторияға пайдалы ақпарат берген кезде пайда болады. Мысалы, жергілікті трендтер, клиенттердің мінез-құлқындағы өзгерістер немесе саладағы жаңа тәжірибелер туралы пікірлер медиа үшін қызықты», – дейді ол.

Сарапшының айтуынша, кәсіпкерлер ақпараттық себептерді өздері де қалыптастыра алады. Мәселен, клиенттер арасында шағын зерттеу жүргізу, салалық статистика жинау немесе маусымдық трендтер туралы пікір білдіру.

Мысал ретінде ол алғашқы жылдары жабылу қаупінде тұрған қазақстандық IT-компаниялардың бірін келтіреді. Кейіннен бұл компания өз сегментіндегі жетекші ойыншылардың біріне айналған. Оның негізін қалаушы іскерлік медиаға IT нарығының дамуы туралы тұрақты түрде пікір білдіріп отырған. Қазір компанияның шешімдерін Қазақстандағы орта және ірі бизнестің шамамен 30 пайызы қолданады.

Осындай тәсілді азық-түлік жеткізу қызметтерінің ірі сервистерінің бірі де пайдаланған. Компания медиа жарияланымдары арқылы логистикалық технологиялар мен электрондық коммерцияның дамуы туралы айтып отырған. Бұл жариялылық брендтің танымалдығын арттырып, инвесторлардың назарын аударуға мүмкіндік берген.

Бұл ретте алғашқы нәтижелер кейде өте жылдам байқалуы мүмкін. Кейбір жағдайларда материал жарияланған күні немесе келесі күні-ақ алғашқы сұраныстар түседі.

«Дегенмен медианың кейінге қалдырылған әсері де бар. Жарияланған мақала іздеу жүйелері, қайта жарияланымдар және жаңа клиенттермен келіссөздер арқылы бірнеше апта, ай, тіпті жылдар бойы жұмыс істей береді. Әсіресе материал іздеу жүйелеріне дұрыс оңтайландырылған болса», – дейді Халина.

Сарапшының айтуынша, сенім жарияланымдардың көптігімен емес, жүйелілік арқылы қалыптасады. Яғни релевантты медиада бірінен кейін бірі шыққан бірнеше материал ірі басылымдағы бір реттік жарияланымнан әлдеқайда тиімді болуы мүмкін.

Сондықтан бизнес үшін БАҚ-пен жұмыс бір реттік PR-науқан емес, нарықта ұзақ мерзімді сенім мен бедел қалыптастыру стратегиясына айналуы тиіс.