Áielin óltirdi degen kúdikke ilingen burynǵy Ulttyq ekonomika ministri Qýandyq Bishimbaev ákesi uiymdastyrǵan piardyń arqasynda jazadan qutylyp ketýi múmkin. Bul týraly belgili saiasatker Muhtar Taijan málimdedi, dep habarlaidy Dalanews.kz.
Eske salaiyq, 2023 jyly 9 qarashada burynǵy Ulttyq ekonomika ministri Qýandyq Bishimbaev áieli Saltanat Núkenovany óltirdi degen kúdikpen ustalǵan bolatyn. Atalmysh oqiǵa meiramhanada oryn alyp, beinekameralarǵa túsip qalǵan.
22 aqpanda Bishimbaevtyń advokattary suhbat berip, onda kisi óltirý bolmaǵanyn jáne Bishimbaev óz kinásin moiyndamaitynyn jetkizdi. Bul málimdemeler kópshiliktiń narazylyǵyn týdyrdy.
Saiasatker ári kásipker Muhtar Taijan advokattarmen bolǵan suhbat Qýandyq Bishimbaevtyń atyna kir keltirmeýge baǵyttalǵan úlken naýqannyń bir bóligi dep esepteidi. Al onyń bastamashysy bedeldi depýtat, akademik, kúdiktiniń ákesi Ýálihan Bishimbaev ekenine senimdi.
"Men kisi óltirýshilerdiń ómirin saqtap qalǵan dárigerlerdi kinálamaimyn. Bul - olardyń kásibi, mindeti jáne anty. Olar kez kelgen adamdy emdeýge ári qutqarýǵa mindetti. Sonymen qatar kisi óltirýshilerdi qorǵap jatqan advokattarǵa da kiná artpaimyn. Bul da olardyń kásibi, mindeti, anty. Olar árbir adamdy qorǵaýǵa mindetti. Alaida bul iske Bishimbaevtyń ákesi, akademik, laýreat, eńbek sińirgen qairatker, rektor jáne Nur-Otan partiiasynyń depýtaty, Nazarbaevtyń dosy Ýálihan Bishimbaevty kináli dep sanaimyn. Sebebi ol memlekettiń qarjysyn jymqyrǵan uryny tárbieledi. Bul sotpen dáleldendi. Nazarbaev arqyly ol ulyna keshirim berýin suraǵanyna senimdimin. Sondyqtan iri qylmysker bostandyqqa shyǵyp, jazalanbaitynyna senimdi boldy. Bunyń arty úlken tragediiaǵa ákeldi. Qazir kishi Bishimbaev áieli Saltanat Núkenovany erekshe qatygezdikpen óltirdi degen kúdikke ilindi. Endi mine, ákesi BAQ arqyly ulyn aqtap shyǵýǵa tyrysyp jatyr. Tipti balasynyń áreketine bailanysty ókinetinin jetkizgen sózi de joq. Eger sot Qýandyqtyń kinásin dáleldese, ákesin de barlyq ataǵynan aiyrýdy talap etýimiz qajet. Onyń tárbiesi men is-áreketi aqyr sońynda jazyqsyz adamnyń ólimine ákeldi. Ol marapat pen qurmetke laiyq emes. Sógis pen uiatqa laiyq dep aitatyn edim. Bul basqa da urpaq tárbielep otyrǵan ata-analarǵa úlken sabaq bolady", - dep jazdy Taijan.
