Jaqynda Saltanat Núkenovanyń ólimine qatysty is boiynsha sot protsesi bastalady, - dep habarlaidy Dalanews.kz.
Bul týraly bala quqyqtary jónindegi ýákil Dinara Zákieva jazdy.
"Jaqynda Saltanat Núkenovanyń ólimine qatysty daýly is boiynsha sot protsesi bastalady. ...Kún saiyn qylmystar týraly qorytyndy alyp, áielder men balalar bastan keshirgen ádiletsizdikti kórip, ...áli kúnge deiin úidegi zorlyq-zombylyqty aqtaýǵa bolady deitin adamdar baryn baiqaimyn. Kez kelgen zorlyq-zombylyq úshin jaza bultartpas ári eń qatal bolýy kerek.
Saltanat Núkenovanyń isin bastamas buryn nemese sot kezinde sottalýshyny aqtaý maqsatynda derekterdi burmalaý áreketteri jasalyp baǵady degen aqparat bar. Qazirdiń ózinde keibir adamdar osy media naýqanǵa kiristi. Qalai ǵana buǵan qatysa alady, qalai ǵana zorlyqty aqtaýǵa bolady?!
El azamaty, áiel, bala quqyqtary jónindegi ýákil retinde sot protsesin muqiiat qadaǵalaimyn. Qoǵam bolyp, balalarǵa, áielderge jasalǵan kez kelgen zorlyqta ádildikke jetýimiz kerek", - dedi Zákieva.
Al jýrnalist Syrym Itqulov bul oqiǵa boiynsha advokattar is materialdarymen tanysyp bitýge taiaǵanyn, zań praktikasy boiynsha jaqyn arada prokýrorǵa jiberiletinin, Bishimbaevtyń ózi sotqa tartylatynyn jazdy.
Aita keteiik, eks-ministr Bishimbaevqa áieli Saltanat Núkenovany asqan qatygezdikpen óltirdi degen aiyp taǵylyp otyr.
Bul oqiǵa 2023 jylǵy 9 qarashada Astana meiramhanalarynyń birinde boldy. Saldarynan burynǵy ulttyq ekonomika ministri Qýandyq Bishimbaevtyń áieli Saltanat Núkenova qaitys boldy. Al eks-shendi qamaýda otyr.
