جاقىندا سالتانات نۇكەنوۆانىڭ ولىمىنە قاتىستى ءىس بويىنشا سوت پروسەسى باستالادى، - دەپ حابارلايدى Dalanews.kz.
بۇل تۋرالى بالا قۇقىقتارى جونىندەگى ۋاكىل دينارا زاكييەۆا جازدى.
"جاقىندا سالتانات نۇكەنوۆانىڭ ولىمىنە قاتىستى داۋلى ءىس بويىنشا سوت پروسەسى باستالادى. ...كۇن سايىن قىلمىستار تۋرالى قورىتىندى الىپ، ايەلدەر مەن بالالار باستان كەشىرگەن ادىلەتسىزدىكتى كورىپ، ...ءالى كۇنگە دەيىن ۇيدەگى زورلىق-زومبىلىقتى اقتاۋعا بولادى دەيتىن ادامدار بارىن بايقايمىن. كەز كەلگەن زورلىق-زومبىلىق ءۇشىن جازا بۇلتارتپاس ءارى ەڭ قاتال بولۋى كەرەك.
سالتانات نۇكەنوۆانىڭ ءىسىن باستاماس بۇرىن نەمەسە سوت كەزىندە سوتتالۋشىنى اقتاۋ ماقساتىندا دەرەكتەردى بۇرمالاۋ ارەكەتتەرى جاسالىپ باعادى دەگەن اقپارات بار. ءقازىردىڭ وزىندە كەيبىر ادامدار وسى مەديا ناۋقانعا كىرىستى. قالاي عانا بۇعان قاتىسا الادى، قالاي عانا زورلىقتى اقتاۋعا بولادى؟!
ەل ازاماتى، ايەل، بالا قۇقىقتارى جونىندەگى ۋاكىل رەتىندە سوت پروسەسىن مۇقيات قاداعالايمىن. قوعام بولىپ، بالالارعا، ايەلدەرگە جاسالعان كەز كەلگەن زورلىقتا ادىلدىككە جەتۋىمىز كەرەك"، - دەدى زاكييەۆا.
ال جۋرناليست سىرىم يتقۇلوۆ بۇل وقيعا بويىنشا ادۆوكاتتار ءىس ماتەريالدارىمەن تانىسىپ بىتۋگە تاياعانىن، زاڭ پراكتيكاسى بويىنشا جاقىن ارادا پروكۋرورعا جىبەرىلەتىنىن، بيشىمبايەۆتىڭ ءوزى سوتقا تارتىلاتىنىن جازدى.
ايتا كەتەيىك، ەكس-مينيستر بيشىمبايەۆقا ايەلى سالتانات نۇكەنوۆانى اسقان قاتىگەزدىكپەن ءولتىردى دەگەن ايىپ تاعىلىپ وتىر.
بۇل وقيعا 2023 جىلعى 9 قاراشادا استانا مەيرامحانالارىنىڭ بىرىندە بولدى. سالدارىنان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ايەلى سالتانات نۇكەنوۆا قايتىس بولدى. ال ەكس-شەندى قاماۋدا وتىر.
