Áielin óltirdi dep aiyptalyp otyrǵan eks-ministr Qýandyq Bishimbaevqa qatysty sot otyrysynda kútpegen málimdeme jasaldy. Búgingi sot otyrysynda Baqytjan Baijanov tergeý izoliatorynda onyń Bishimbaevpen kezdesýin uiymdastyrǵan adam bolǵanyn málimdedi, - dep habarlaidy Dalanews.kz.
Baijanov tergeý izoliatoryna Baýyrjan Mýsin esimdi adam kelgenin aitty.
"Baýyrjan Mýsin maǵan tórt ret keldi. Meni kameradan shyǵaryp aldy. Oǵan barsam, janynda Bishimbaev tur. Iaǵni ol kezdeskisi kelgen. Men birden burylyp, ketip qaldym. Ákimshilikke maǵan jaqyndamasyn dedim, óitkeni onyń maǵan kelýin suramadym. Meniń advokattarym da suramady. Ol sodan keiin de eki-úsh ret kelip, meni Saltanattyń otbasyna qarsy qoiýǵa tyrysty", - dep jaýap berdi Baijanov.
BAQ-ta Baýyrjan Mýsin degen adamnyń esimi 2017, 2018 jyldary jii jazylǵan. abai.kz málimetinshe, ol sol kezdegi QR Din isteri jáne azamattyq qoǵam ministrliginiń Azamattyq qoǵam isteri jónindegi komiteti tóraǵasynyń orynbasary boldy degen aqparat bar. Sonymen qatar, Mýsinniń 400 myń teńge paramen ustalyp, qamaýǵa alynǵany týraly da derekter bar.
"Jemqorlyqqa qarsy is-qimyl ulttyq biýrosynyń Astana qalalyq departamenti QR Din isteri jáne azamattyq qoǵam ministrliginiń Azamattyq qoǵam isteri jónindegi komiteti tóraǵasynyń orynbasary B.Mýsinniń memlekettik satyp alýǵa qatysýshylar múddesin lobbileý úshin júieli túrde para alǵanyn anyqtady", - dep habarlady sol kezde Ulttyq biýronyń baspasóz qyzmeti ókilderi.
abai.kz málimetine súiensek, B.Mýsin kásipkerden 400 myń teńge kólemindegi paranyń kezekti bóligin alý barysynda ustalǵan. Paranyń jalpy somasy 1,4 million teńge bolǵan. Keiin oǵan 7 jylǵa jaza taǵaiyndalǵan. Degenmen derekterde onyń da Bishimbaev sekildi uzaq ýaqyt jazasyn ótep, túrmede otyrmaǵany aitylady.
Sonymen qatar, orda.kz aqparatynda buǵan deiin Mýsin Aitbek Amangeldige qarsy túrli jazbalar jazǵan degen de derekter bar. Iaǵni marqum Núkenovanyń aǵasyn Bishimbaevtyń balalaryna qatysty aiyptaǵan.
"Ol kishkentai qyzdy shashynan ustap, úide súiregen. Basqa balalar qatty qorqyp, bólmede jasyrynyp qalǵan, al ol Bishimbaevqa qońyraý shalyp, zorlyq qoldanamyn dep aiǵailaǵan", - dep keltirgen basylym.
Al áleýmettik jelide Baýyrjan Mýsin esimdi adamnyń jazbasy paida boldy.
"Bishimbaev isi boiynsha sotta aiyptalýshy Baijanov meniń familiiamdy ataǵanyn estidim, oǵan elordanyń tergeý izoliatorynda qysym kórsetippin-mys.
Mundai nárse eshqashan bolmaǵanyn resmi túrde málimdeimin jáne men oǵan eshqashan qysym jasaǵan emespin, olai isteýdi de oilaǵan emespin! Astana qalasynyń tergeý izoliatorynda beinebaqylaý kameralary men tergeý izoliatory qyzmetkerleri bar. Ol eshqashan oǵan qysym kórsetkenim nemese qorqytqanym nemese bireýdi qorlaǵanym týraly shaǵym túsirgen emes! Búgin oǵan jala japqany úshin sotqa aryz beremin!" - dedi ol.
