Әйелін өлтірді деп айыпталып отырған экс-министр Қуандық Бишімбаевқа қатысты сот отырысында күтпеген мәлімдеме жасалды. Бүгінгі сот отырысында Бақытжан Байжанов тергеу изоляторында оның Бишімбаевпен кездесуін ұйымдастырған адам болғанын мәлімдеді, - деп хабарлайды Dalanews.kz.
Байжанов тергеу изоляторына Бауыржан Мусин есімді адам келгенін айтты.
"Бауыржан Мусин маған төрт рет келді. Мені камерадан шығарып алды. Оған барсам, жанында Бишімбаев тұр. Яғни ол кездескісі келген. Мен бірден бұрылып, кетіп қалдым. Әкімшілікке маған жақындамасын дедім, өйткені оның маған келуін сұрамадым. Менің адвокаттарым да сұрамады. Ол содан кейін де екі-үш рет келіп, мені Салтанаттың отбасына қарсы қоюға тырысты", - деп жауап берді Байжанов.
БАҚ-та Бауыржан Мусин деген адамның есімі 2017, 2018 жылдары жиі жазылған. abai.kz мәліметінше, ол сол кездегі ҚР Дін істері және азаматтық қоғам министрлігінің Азаматтық қоғам істері жөніндегі комитеті төрағасының орынбасары болды деген ақпарат бар. Сонымен қатар, Мусиннің 400 мың теңге парамен ұсталып, қамауға алынғаны туралы да деректер бар.
"Жемқорлыққа қарсы іс-қимыл ұлттық бюросының Астана қалалық департаменті ҚР Дін істері және азаматтық қоғам министрлігінің Азаматтық қоғам істері жөніндегі комитеті төрағасының орынбасары Б.Мусиннің мемлекеттік сатып алуға қатысушылар мүддесін лоббилеу үшін жүйелі түрде пара алғанын анықтады", - деп хабарлады сол кезде Ұлттық бюроның баспасөз қызметі өкілдері.
abai.kz мәліметіне сүйенсек, Б.Мусин кәсіпкерден 400 мың теңге көлеміндегі параның кезекті бөлігін алу барысында ұсталған. Параның жалпы сомасы 1,4 миллион теңге болған. Кейін оған 7 жылға жаза тағайындалған. Дегенмен деректерде оның да Бишімбаев секілді ұзақ уақыт жазасын өтеп, түрмеде отырмағаны айтылады.
Сонымен қатар, orda.kz ақпаратында бұған дейін Мусин Айтбек Амангелдіге қарсы түрлі жазбалар жазған деген де деректер бар. Яғни марқұм Нүкенованың ағасын Бишімбаевтың балаларына қатысты айыптаған.
"Ол кішкентай қызды шашынан ұстап, үйде сүйреген. Басқа балалар қатты қорқып, бөлмеде жасырынып қалған, ал ол Бишімбаевқа қоңырау шалып, зорлық қолданамын деп айғайлаған", - деп келтірген басылым.
Ал әлеуметтік желіде Бауыржан Мусин есімді адамның жазбасы пайда болды.
"Бишімбаев ісі бойынша сотта айыпталушы Байжанов менің фамилиямды атағанын естідім, оған елорданың тергеу изоляторында қысым көрсетіппін-мыс.
Мұндай нәрсе ешқашан болмағанын ресми түрде мәлімдеймін және мен оған ешқашан қысым жасаған емеспін, олай істеуді де ойлаған емеспін! Астана қаласының тергеу изоляторында бейнебақылау камералары мен тергеу изоляторы қызметкерлері бар. Ол ешқашан оған қысым көрсеткенім немесе қорқытқаным немесе біреуді қорлағаным туралы шағым түсірген емес! Бүгін оған жала жапқаны үшін сотқа арыз беремін!" - деді ол.
