Áielin óltirdi dep aiyptalyp otyrǵan Qýandyq Bishimbaevqa qatysty sot otyrysy áli de jalǵasyp jatyr. Protsess barysynda oqiǵa bolǵan kúni shaqyrtýǵa kelgen politseidiń jetonynan video kórsetilip jatyr, - dep habarlaidy Dalanews.kz.
Astana qalasynyń mamandandyrylǵan aýdanaralyq sotynda ótip jatqan sot otyrysy barysynda Saltanat Núkenovanyń sińilisi, sonymen qatar, oqiǵa bolǵan jerge shaqyrtýǵa kelgen jedel járdem qyzmetkeri men politsiia jaýap berdi.
Kadrlarda politseiler Bishimbaevtan jaýap alyp jatqan sát te kórinedi.
Videoda "tańǵa deiin urystyq" degen daýystar estiledi.
Jábirlenýshi tarap ókili Aitbek Amangeldi videoǵa qatysty pikir bildirip, kadrlarda Bishimbaev ózin qalypty ustaǵanyn aitady.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Sot otyrystarynda oqiǵa bolǵan kezdiń, dálirek, Bishimbaev Saltanatty shashynan súirep, tepkilegen sumdyq kadrlar kórsetildi.
Al búgin Qýandyq Bishimbaev Saltanat Núkenova qaitys bolǵan túni ne úshin kóripkelge habarlasqanyn túsindirdi. Onyń sózinshe, qaiǵyly oqiǵa bolǵan túni jedel járdem shaqyrýdyń ornyna habarlasqan kóripkel Shymkentte turady.
"Bizneske qatysty suraqtarǵa bailanysty habarlasyp turatynmyn. Onyń meditsinalyq bilimi bar-joǵyn bilmeimin. Oǵan senetinmin", - deidi Bishimbaev.
Sonymen qatar, eks-ministr qaiǵyly oqiǵa bolǵan túni nelikten basqa qalada júrgen kóripkelge habarlasqanyn aitty.
"Siz (advokat - esk.) Saltanat meditsinalyq kómekke zárý bolyp jatqanda deisiz. Meniń túsinigimde ol (Saltanat - esk.) uiyqtap jatqan bolatyn. Men oǵan (kóripkelge - esk.) sengenmin dep aittym. Betinde sol jaǵynda kógerip turǵan jer úlkeie bastady. Ol qaidan shyqqanyn suraiyn dedim. Kóripkel "bári durys, keshke deiin uiyqtasyn, sharshaǵan ǵoi" dedi", - deidi Bishimbaev.
