Eks-ministr Qýandyq Bishimbaev júrgizýshi kýáliginen aiyrylmaidy. Óitkeni ol sotta mas kúide kólik tizginine otyrǵanyn moiyndaǵan edi, - dep habarlaidy Dalanews.kz.
Bishimbaev alkogolge, esirtkige mas ekenin dáleldeitin kýálandyrýdan ótpegeni aitylǵan. Sondai-aq, IIM Ákimshilik quqyqbuzýshylyq týraly kodekstiń (ÁQBtK) 608-baby boiynsha quqyqbuzýshylyqtyń quramdas bóligi mas kúide kólik tizgindeý ekenin eske saldy.
"Meditsinalyq kýálandyrýdyń resmi qorytyndysy jáne ÁQBtK-niń 608-babynda kózdelgen quqyqbuzýshylyq quramy bolmaǵan, sondai-aq, jaýapqa tartýdyń merzimi ótken kezde (ÁQBtK-niń 62-baby) adam osy bap boiynsha ákimshilik jaýapqa tartylmaidy", - dedi IIM ókilderi Tengrinews.kz-ke resmi jaýapta.
4 sáýirde jábirlenýshi taraptyń advokaty Janna Orazbahovanyń suraqtaryna jaýap bergen Bishimbaev 9 qarashaǵa qaraǵan túni "ortashadan sál joǵary" mas bolǵanyn, bul onyń tizginge otyrýyna kedergi bolmaǵanyn aitty.
"Iaǵni, siz mas kúide kólik júrgizdińiz, men sizdi durys túsindim be?" - dep surady Orazbahova.
"Iá", - dep jaýap berdi Bishimbaev.
Al buǵan deiin ishki ister ministriniń orynbasary Igor Lepeha Senat kýlýarynda eks-sheneýnik Qýandyq Bishimbaevty ustaý kezindegi politseilerdiń áreketine qatysty pikir bildirdi.
Qýandyq Bishimbaevqa qatysty sot otyrysynda politseidiń jetonynan video kórsetilgen bolatyn. Jýrnalister kýlýarda jaýapty ókilden politsiianyń áreketi qanshalyq zańdy bolǵanyn, "nelikten Bishimbaevtyń qolynan kisendi sheship, temeki shegýine ruqsat bergenin" surady. Sonymen qatar, quzyrly organ qyzmetkerleri Bishimbaevtan marqum Núkenovaǵa qatysty "ózi qandy ishti me?" dep suraǵan.
Jýrnalisterge bergen jaýabynda Igor Lepeha bul derek tekseriletinin jetkizdi.
"Jetondaǵy videony kórgen joqpyn, zerttep kóreiik. Olar temeki shegýge ruqsat bermeýi kerek edi, biraq qolyndaǵy kisenin sheshe alady. Arnaiy erejeleri bar. Iaǵni ol kólikke deiin kisenmen barýy kerek, al kólikke otyrǵan kezde kisendi sheship tastai alamyz. Bul - qalypty jaǵdai, sebebi erteń bizdi azaptady dep kinálamaýy qajet. Bul jerde oǵash eshteńe kórip turǵan joqpyn. Al temeki shegýge keler bolsaq, qarap, zertteý kerek. Bizdiń barlyq áreketimizge baǵa beretin tiisti bólimsheler bar", - dedi Igor Lepeha.
Sonymen qatar, vedomstvo ókili baǵa beretin bólim basshysyna jetkizetinin málimdedi.
"Olardyń tiisti basshysy bar, olarǵa osy áńgimeni jetkizemin. Olar zertteidi", - dedi ministrdiń orynbasary.
