Qýandyq Bishimbaevqa qatysty sot otyrystarynyń birinde marqum Saltanat Núkenovanyń anasy Bishimbaev kólikpen bala qaqqany jóninde aitqan edi. Ishki ister ministriniń orynbasary Igor Lepeha bul aqparat tekserilgenin aitty, - dep habarlaidy Dalanews.kz.
"(Bishimbaev - esk.) kólikpen bala qaǵyp ketti degen aqparatqa toqtalaiyn. Bul aqparat rastalmady. Marqumnyń (Saltanat Núkenovanyń - esk.) týystarymen, onyń ishinde aǵasymen de sóilestik. Aqparat qaidan shyqqanyn tekserdik. Biraq onda basqa jaǵdai týraly aitylǵan. Sondyqtan bul aqparat rastalmady", - dedi Igor Lepeha Májilistiń jalpy otyrysynan soń.
Buǵan deiin jábirlenýshi tarap ókili Bishimbaev jaýapkershilikten qutylǵanyn da aitqan edi. Al keiin IIM bul aqparatty tekseretinin málimdedi.
Sonymen qatar, eks-ministr Qýandyq Bishimbaev júrgizýshi kýáliginen aiyrylmaidy. Óitkeni ol sotta mas kúide kólik tizginine otyrǵanyn moiyndaǵan edi.
Bishimbaev alkogolge, esirtkige mas ekenin dáleldeitin kýálandyrýdan ótpegeni aitylǵan. Sondai-aq, IIM Ákimshilik quqyqbuzýshylyq týraly kodekstiń (ÁQBtK) 608-baby boiynsha quqyqbuzýshylyqtyń quramdas bóligi mas kúide kólik tizgindeý ekenin eske saldy.
"Meditsinalyq kýálandyrýdyń resmi qorytyndysy jáne ÁQBtK-niń 608-babynda kózdelgen quqyqbuzýshylyq quramy bolmaǵan, sondai-aq, jaýapqa tartýdyń merzimi ótken kezde (ÁQBtK-niń 62-baby) adam osy bap boiynsha ákimshilik jaýapqa tartylmaidy", - dedi IIM ókilderi Tengrinews.kz-ke resmi jaýapta.
4 sáýirde jábirlenýshi taraptyń advokaty Janna Orazbahovanyń suraqtaryna jaýap bergen Bishimbaev 9 qarashaǵa qaraǵan túni "ortashadan sál joǵary" mas bolǵanyn, bul onyń tizginge otyrýyna kedergi bolmaǵanyn aitty.
"Iaǵni, siz mas kúide kólik júrgizdińiz, men sizdi durys túsindim be?" - dep surady Orazbahova.
"Iá", - dep jaýap berdi Bishimbaev.
