Atyshýly Bishimbaev isinde tanymal kásipker Raiymbek Batalovtyń da esimi ataldy. Buǵan deiingi sot otyrystarynyń birinde eks-ministr Qýandyq Bishimbaev "áielin buryn Raiymbek esimdi tanymal kásipkermen jaqyn qarym-qatynasta bolǵan" dep te aiyptady. Raiymbek Batalov óz esimin dúiim jurttyń aldynda qaralaǵan Bishimbaevtyń sottaǵy aiǵaqtarynan keiin málimdeme jasaýǵa bekingen, - dep habarlaidy Dalanews.kz.
Kúni keshegi sot otyrysynda sýdia Aijan Qulbaeva Bishimbaevtyń uialy telefonynan sumdyq kadrlardy zerdelep shyqty. Videolarda Bishimbaev áielin balaǵattap, qaita-qaita "Raiymbek Batalovpen tósektes boldyń ba?" dep suraqtyń astyna alǵany estiledi.
Al Batalov sot otyrysyna qatysty sońyna deiin ún qatqysy kelmegenin aitty. Onyń sózinshe, atyna nuqsan keltiretin sumdyq aqparattar málimdeme jasaýǵa májbúr etken.
"Aýyr qylmys jasady degen aiyptalýshynyń maǵan qatysty aitqany - bos sandyraq, ótirik. Sizderdi bul ótirikke senbeýge, BAQ ókilderi men blogerlerdi jalǵan aqparat taratpaýǵa shaqyramyn. Osyndai qaiǵyǵa tap bolǵan Saltanattyń týystary men jaqyndary qyzynyń abyroiyn qorǵaýǵa májbúr bolǵany óte ókinishti. Bul sumdyq. Núkenovtar otbasyna shyn júrekten kóńil aitamyn", - dedi Batalov.
Buǵan deiin kásipker Raiymbek Batalovtyń áieli Lenara Batalova da Bishimbaev isine qatysty pikir bildirgen edi.
"Men bolǵan jaitqa qatysty pikir bildirsem dep edim. Sebebi meniń instagramym "jarylaiyn" dep tur. Keshe el bolyp atyshýly protseske kýá boldyq. Protsess 1 sáýirge sáikes kelip qaldy. Onyń mazmuny da soǵan sai bolǵan sekildi. Biz atyshýly isti emes, "Pýst govoriat" shoýyn kórip otyrǵandai boldyq. Sotta meniń otbasymnyń abyroiyna nuqsan keltirgen negizsiz, oiǵa qonymsyz nárselerge qatysty ne derimdi bilmeimin. Saltanattyń jaqyndaryna sabyr men kúsh-qýat tileimin jáne ádildik ornaidy dep senemin. Biz sizdermen birgemiz", - deidi Lenara Batalova.
Raiymbek Batalov - quramyna Raimbek Agro, Raimbek Group Plus, City Fair Trade ltd, Raimbek Bottlers Group kompaniialary kiretin Raimbek Group holdinginiń iesi jáne direktorlar keńesiniń tóraǵasy.
Qazirgi tańda "Atameken" tóralqasynyń tóraǵasy.
