اتىشۋلى بيشىمبايەۆ ىسىندە تانىمال كاسىپكەر رايىمبەك باتالوۆتىڭ دا ەسىمى اتالدى. بۇعان دەيىنگى سوت وتىرىستارىنىڭ بىرىندە ەكس-مينيستر قۋاندىق بيشىمبايەۆ "ايەلىن بۇرىن رايىمبەك ەسىمدى تانىمال كاسىپكەرمەن جاقىن قارىم-قاتىناستا بولعان" دەپ تە ايىپتادى. رايىمبەك باتالوۆ ءوز ەسىمىن ءدۇيىم جۇرتتىڭ الدىندا قارالاعان بيشىمبايەۆتىڭ سوتتاعى ايعاقتارىنان كەيىن مالىمدەمە جاساۋعا بەكىنگەن، - دەپ حابارلايدى Dalanews.kz.
كۇنى كەشەگى سوت وتىرىسىندا سۋديا ايجان قۇلبايەۆا بيشىمبايەۆتىڭ ۇيالى تەلەفونىنان سۇمدىق كادرلاردى زەردەلەپ شىقتى. ۆيدەولاردا بيشىمبايەۆ ايەلىن بالاعاتتاپ، قايتا-قايتا "رايىمبەك باتالوۆپەن توسەكتەس بولدىڭ با؟" دەپ سۇراقتىڭ استىنا العانى ەستىلەدى.
ال باتالوۆ سوت وتىرىسىنا قاتىستى سوڭىنا دەيىن ءۇن قاتقىسى كەلمەگەنىن ايتتى. ونىڭ سوزىنشە، اتىنا نۇقسان كەلتىرەتىن سۇمدىق اقپاراتتار مالىمدەمە جاساۋعا ءماجبۇر ەتكەن.
"اۋىر قىلمىس جاسادى دەگەن ايىپتالۋشىنىڭ ماعان قاتىستى ايتقانى - بوس ساندىراق، وتىرىك. سىزدەردى بۇل وتىرىككە سەنبەۋگە، ب ا ق وكىلدەرى مەن بلوگەرلەردى جالعان اقپارات تاراتپاۋعا شاقىرامىن. وسىنداي قايعىعا تاپ بولعان سالتاناتتىڭ تۋىستارى مەن جاقىندارى قىزىنىڭ ابىرويىن قورعاۋعا ءماجبۇر بولعانى وتە وكىنىشتى. بۇل سۇمدىق. نۇكەنوۆتار وتباسىنا شىن جۇرەكتەن كوڭىل ايتامىن"، - دەدى باتالوۆ.
بۇعان دەيىن كاسىپكەر رايىمبەك باتالوۆتىڭ ايەلى لەنارا باتالوۆا دا بيشىمبايەۆ ىسىنە قاتىستى پىكىر بىلدىرگەن ەدى.
"مەن بولعان جايتقا قاتىستى پىكىر بىلدىرسەم دەپ ەدىم. سەبەبى مەنىڭ ينستاگرامىم "جارىلايىن" دەپ تۇر. كەشە ەل بولىپ اتىشۋلى پروسەسكە كۋا بولدىق. پروسەسس 1 ساۋىرگە سايكەس كەلىپ قالدى. ونىڭ مازمۇنى دا سوعان ساي بولعان سەكىلدى. ءبىز اتىشۋلى ءىستى ەمەس، "پۋست گوۆوريات" شوۋىن كورىپ وتىرعانداي بولدىق. سوتتا مەنىڭ وتباسىمنىڭ ابىرويىنا نۇقسان كەلتىرگەن نەگىزسىز، ويعا قونىمسىز نارسەلەرگە قاتىستى نە دەرىمدى بىلمەيمىن. سالتاناتتىڭ جاقىندارىنا سابىر مەن كۇش-قۋات تىلەيمىن جانە ادىلدىك ورنايدى دەپ سەنەمىن. ءبىز سىزدەرمەن بىرگەمىز"، - دەيدى لەنارا باتالوۆا.
رايىمبەك باتالوۆ - قۇرامىنا Raimbek Agro، Raimbek Group Plus، City Fair Trade ltd، Raimbek Bottlers Group كومپانيالارى كىرەتىن Raimbek Group حولدينگىنىڭ يەسى جانە ديرەكتورلار كەڭەسىنىڭ ءتوراعاسى.
قازىرگى تاڭدا "اتامەكەن" ءتورالقاسىنىڭ ءتوراعاسى.
