Zańger Erjan Esimhanov Qýandyq Bishimbaevtyń sot protsesine qatysty pikir bildirdi, - dep habarlaidy Dalanews.kz.
Aita keteiik, áleýmettik jelide qazaqstandyqtar sýdia, prokýror men advokattardyń dórekiligine narazy bolǵan. Zańgerdiń sózinshe,olardyń ózin ustaýyna tańǵalýdyń qajeti joq.
«Bul búkil el onlain kórýge múmkindik alǵan aýqymdy protsess, sondyqtan kásibi mamandar da, qatysy joq adamdar da protseske qatysty pikir bildirýge tyrysyp jatyr. Olardyń kóbi protsess qalai órbip jatqanyna narazy. Prokýrorlar selqos, aiyptalýshynyń advokattary dóreki, sýdia protsesti baqylaýda ustamai otyr deidi. Sondyqtan adamdarda protsess baqylaýda tur, sheshim belgili, ádildik bolmaidy degendei oi qalyptasqandai bolǵan.
Bul qalypty nárse, árkim óz oiyn aitýǵa quqyly. Biraq bir niýans bar. Muny buǵan deiin sot protsesterine qatysqan adam túsinedi. Olardyń ózin bulai ustaýy jańalyq emes, olar ózin únemi osylai ustaidy. Únemi. Prokýrorlar selqos. Bir tujyrymdy qaitalai beredi. Zańgerler olar ne úshin bir nárseni qaitalai beretinin túsinedi, aiyptaýshy taraptyń belgili bir protsedýralyq mindeti bar, olar sol tapsyrmany oryndaýy kerek», - deidi zańger.
Erjan Esimhanovtyń sózinshe, advokattardyń ózin dóreki ustaýy da qalypty nárse.
«Olardyń etikaǵa pysqyrǵany bar. Qarsy tarapqa uialmai qysym jasap, sýdia baiqamaidy degen úmitpen derekterdi burmalap, nátijesinde solai da bolyp jatady. Sýdialar da sondai. Protsesti baqylamaidy. Ne bolyp jatqanyn túsinbeidi. Sýdia ózin agressivti ustap otyrǵan adamǵa qarsylaspaidy. Keide sýdialardyń ózi de ózin agressivti túrde ustaýy múmkin. Al sotta ne bolyp jatqanyn múldem túsinbeýi múmkin», - deidi Esimhanov.
Onyń sózinshe, bul protsess turmystyq zorlyq-zombylyqtyń aldyn alýdaǵy úlken qadam. Taǵy bir mańyzdy tusy – qazaqstandyqtar osy sot protsesi arqyly eldegi sot júiesi qalai jumys isteitinin kórýge, bilýge múmkindik alǵan. ⠀
"Sondyqtan tańǵalyp, sot protsesinen qandai da bir logika izdeýdiń qajeti joq. Sebebi bul jaǵdaida sheshimdi sot shyǵarmaidy. Sheshimdi alqabiler shyǵarady. Al sot alqabiler eki tarapty jáne iske qatysty derekterdi durys túsinýine jaǵdai jasaýy kerek - al sot kei jaǵdaida ózi de eshteńe túsinbei otyrady.
Protsess sheshimi qandai bolady dep boljam jasai almaimyz. Sondyqtan oǵan qatysty pikirdi eger logikaǵa syimaityn úkim shyqsa keiinirek aitarmyn. Sol kezde qandai da bir narazylyq bildirý qajet. Sol jaǵdaida ǵana bir nárse ózgerte alamyz", - deidi zańger.
Aita keteiik, 1 sáýirde ótken sot otyrysynda Qýandyq Bishimbaev Saltanat Núkenovamen qarym-qatynasy týraly óz nusqasyn aitqan bolatyn. Sonymen qatar, Bishimbaev sotta Saltanattyń jeke ómirindegi burynǵy jaittar týraly da aitty.
Odan bólek, Bishimbaev iske qatysty aqparattar burmalanǵanyn málimdedi.
Endigi sot otyrysy 3 sáýirde 10.00-de bolady.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Keiin Qýandyq Bishimbaev sotta Saltanat Núkenovany asa qatygezdikpen óltirgenin moiyndamady.
Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
