Astanada azamattyq nekedegi áieli Saltanat Núkenovany óltirdi dep aiyptalǵan burynǵy ulttyq ekonomika ministri Qýandyq Bishimbaevtyń kezekti sot otyrysy jalǵasyp jatyr, dep habarlaidy Dalanews.kz.
Sot otyrysyn aiyptaýshy taraptyń Bishimbaevtyń tergeýden bas tartqanyn málimdeýinen bastaldy.
Memlekettik aiyptaýshynyń aitýynsha, 2023 jyldyń 19 jeltoqsanynda kúdiktini tergeý áreketi josparlanǵan.
"Alaida kúdiktiniń advokatyna habarlasqan soń, Bishimbaevtyń áli daiyn emestigi jáne densaýlyǵyna bailanysty aiǵaqtardy tekserýge barýdan bas tartyp otyrǵanyn túsindiredi. Osyǵan bailanysty tergeý amaldary júrgizilgen joq. 22 jeltoqsanda da kúdik dálelderin tekserý josparlanǵan bolatyn. Biraq keiinirek advokattar Bishimbaevtyń kýálik berý úshin sol jerge barýǵa daiyn emes ekenin túsindirdi", - dedi prokýror.
Osyǵan bailanysty memlekettik aiyptaýshy sottalýshydan birneshe ret bas tartý sebebin túsindirýdi surady.
“Sol kúnderi ózimdi óte jaisyz sezindim. Shynymdy aitsam, osy máseleni talqylaǵan qorǵaýshylarymmen sóilesken kezde olardyń maǵan kómektese alatynyn sezbedim. Sol ýaqytta bolyp jatqan haiptyń kesirinen qarapaiym qorǵaýshy da taba almadym. “Sońǵy kezeńde ǵana bilikti qorǵaýshylarmen jolyqtym jáne olarǵa senim arta bastadym”, - dep jaýap berdi Bishimbaev.
Eske salaiyq, Qýandyq Bishimbaevtyń soty 12 alqabidiń qatysýymen ótip jatyr. Onyń 10-y negizgi, ekeýi qosalqy. Olar 300 úmitkerdiń arasynan tańdaldy.
Bishimbaevqa eki bap boiynsha aiyp taǵyldy: asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý); qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
Aita keteiik, búgin sot otyrysynda sýdia Aijan Kúlbaeva eks-ministrdiń advokattary Leila Ramazanova men Nazken Qusaiynovany sot zalyna kirgizbei qoidy.
Qusaiynova 10 sáýirde ótken sot otyrysynda búgingi sot otyrysyn saǵat 10.00-da bastaýdy suraǵan. Alaida sýdia onyń ótinishin qanaǵattandyrmai, sot otyrysy ádettegidei saǵat 9.30-da bastalatynyn eskertken bolatyn.
Sol sebepti sot otyrysynda Bishimbaevtyń qorǵaýshysy Erlan Ǵazymjanov qana tóbe kórsetti.
"Buǵan deiingi sot otyrystarynda sotqa keshigip kelýge bolmaityny birneshe ret eskertilgen bolatyn. Sot tikelei efirden kórsetilip jatqandyqtan sot otyrysy 9.30-da bastalatynyn bile tura qorǵaýshylar keshigip keldi. Sondyqtan olar sot zalyna kire almaidy. Sot úzilis jariialaǵan kezde olar sotqa qosyla alady", - deidi sýdia.
Al Bishimbaevtyń advokaty Erlan Ǵazymjanov buryn berilgen ótinishterdiń qabyldanbaýyna bailanysty sýdia Aijan Kúlbaevadan bas tartýdy surady.
Alaida sot qorǵaýshynyń qarsylyqtaryn qabyldamady.
"Qorǵaýshy tarap protseske qatysýshylardyń barlyǵyn jańylystyrýda", - dep túsindirdi sýdia Aijan Kúlbaeva.
Sýdia alqabilerdi sot zalynan shyǵarýdy buiyrdy, osylaisha sot otyrysynyń transliatsiiasy úzildi.
Sottan bas tartý – sýdiany isti qaraýǵa qatysýdan shettetý, eger ol istiń nátijesine jeke (tikelei nemese janama) múddeli bolsa nemese onyń beitaraptyǵyna kúmán týdyratyn ózge de mán-jailar bolǵan jaǵdaida júzege asyrylady.
