Qazaqstannyń saıası sahnasynda týystyq baılanys áli de kórinis tabady. Eski Qazaqstannan bastaý alǵan bul fenomen jańa Qazaqstanda da jalǵasyn tapqan. Dalanews.kz redaksıasy bılik pen memlekettik qurylymdarda qyzmet etip júrgen aǵaıyndy tulǵalardyń birneshe mysalyna sholý jasady.
Aǵaıyndy Saırovtar
Aǵaıyndy Erlan jáne Serik Saırovtar memlekettik salada kásibı bedel qalyptastyryp úlgergen.
Erlan Bıahmetuly Saırov qazirgi ýaqytta Qazaqstan Respýblıkasy Parlamenti Májilisiniń depýtaty. Ol qoǵamda ótkir pikir bildiretin, saıası jáne áleýmettik máselelerge belsendi aralasatyn tulǵa retinde tanylǵan. Saırov uzaq jyldar boıy memlekettik basqarý, ishki saıasat jáne ıdeologıalyq baǵyttarda qyzmet atqardy. 2019 jyldan bastap Eýrazıalyq ıntegrasıa ınstıtýtyn basqardy, al 2021 jyly Májilis depýtaty retinde qyzmetine kiristi.
Al Serik Bıahmetuly Saırov 2024 jyly Qazaq sý sharýashylyǵy ǵylymı-zertteý ınstıtýtynyń (QazSSHǴZI) bas dırektory bolyp taǵaıyndaldy. Ol gıdrologıa jáne tabıǵı resýrstardy basqarý salasyndaǵy jetekshi sarapshylardyń biri. Buǵan deıin «Qazgıdromet» RMK bas dırektorynyń birinshi orynbasary bolǵan.
Aǵaıyndy Qojasbaevtar
Aǵaıyndy Qojasbaevtar Qazaqstandaǵy túrli kásibı baǵytta qyzmet etip júrgen yqpaldy áýletterdiń biri.
Máselen, Rýslan Sadýaqasuly Qojasbaev qazirgi tańda QR Parlamenti Májilisiniń depýtaty. Buǵan deıin Almaty oblysynyń kásipkerlik jáne ındýstrıalyq-ınnovasıalyq damý basqarmasyn basqarǵan, keıin «Jetisý» áleýmettik-kásipkerlik korporasıasynyń tóraǵasy boldy.
Onyń baýyry Arman Sadýaqasuly Qojasbaev Qarjy mınıstrliginiń Memlekettik kirister komıteti júıesinde qyzmet etedi.
Al Erlan Sadýaqasuly Qojasbaev kásipker, qazirgi ýaqytta Almaty taý klasterin damytý jobasyn júzege asyryp jatyr. Bul bastama Qazaqstannyń damý banki arqyly qarjylandyrylyp, óńirdiń týrızm jáne ınfraqurylym salasyna jańa serpin berýdi kózdeıdi.
Aǵaıyndy Toǵjanovtar
Toǵjanovtar el basqarý júıesinde uzaq jyldyq tájirıbesi bar aǵaıyndy tulǵalar.
Búginde Eraly Luqpanuly Toǵjanov Qazaqstan Respýblıkasynyń Premer-mınıstri Oljas Bektenovtiń keńesshisi qyzmetin atqarady. Buǵan deıin ol Mańǵystaý jáne Aqtóbe oblystaryn basqarǵan, sondaı-aq Úkimettiń vıse-premeri bolǵan. Áleýmettik saıasat, din, etnosaralyq qatynastar jáne óńirlik damý baǵyttarynda mol tájirıbe jınaqtaǵan.
Al Marat Luqpanuly Toǵjanov Batys Qazaqstan oblysy Báıterek aýdanynyń ákimi bolyp qyzmet etedi. Buǵan deıin Aqtóbe oblysy ákiminiń orynbasary qyzmetin atqarǵan.
Aǵaıyndy Qýantyrovtar
Qos aǵaıyndynyń esimi Qazaqstannyń memlekettik basqarý salasynda úlken bedelge ıe.
Álibek Sákenuly Qýantyrov búginde Qazaqstan Respýblıkasynyń Syrtqy ister mınıstrliginiń vıse-mınıstri qyzmetin atqarady. Ol 2005 jyldan beri ekonomıka, búdjet jáne strategıalyq josparlaý salasynda eńbek etip keledi. Ár jyldary ekonomıka jáne búdjet josparlaý mınıstrliginde, sondaı-aq Prezıdent ákimshiliginde jetekshi laýazymdarda bolǵan. 2021–2024 jyldary ulttyq ekonomıka mınıstri retinde eldiń makroekonomıkalyq saıasatyn basqardy. Keıin energetıkalyq salaǵa aýysyp, «KAZENERGY» qaýymdastyǵyn basqardy. 2024 jyldyń shildesinde syrtqy saıasat salasyna kelip, dıplomatıalyq baǵyttaǵy reformalarǵa atsalysyp júr.
Ermek Sákenuly Qýantyrov — «Qazatomprom» ulttyq kompanıasynyń quqyqtyq qamtamasyz etý jáne korporatıvtik basqarý jónindegi bas dırektory. Buǵan deıin ekonomıka jáne ádilet mınıstrlikterinde, Prezıdent ákimshiliginde túrli jaýapty qyzmetter atqarǵan. 2023 jyldan beri atom salasyndaǵy ulttyq kompanıada quqyqtyq saıasat pen korporatıvtik basqarý júıesin jetildirý baǵytynda jumys isteıdi.
Aǵaıyndy Nálibaevtar
Aǵaıyndy Nurlybek jáne Ázimbek Nálibaevtar túrli deńgeıde ákimdik qurylymdarynda eńbek etip, óńirlerdiń áleýmettik-ekonomıkalyq damýyna úles qosyp keledi.
Nurlybek Mashbekuly Nálibaev qazirgi tańda Qyzylorda oblysynyń ákimi qyzmetin atqrady. Onyń eńbek joly 1990 jyldardyń aıaǵynda jeke kásipten bastalǵan. Keıin memlekettik qyzmetke aýysyp, Qyzylorda qalasy ákiminiń orynbasary, Shıeli aýdanynyń ákimi, Qyzylorda qalasynyń ákimi sekildi laýazymdardy atqardy. 2021 jyly Premer-Mınıstr Keńsesinde óńirlik damý bólimin basqardy. 2022 jyldan beri Qyzylorda oblysynyń ákimi retinde jumys istep keledi.
Ázimbek Pazylbekuly — Túrkistan qalasynyń ákimi. 33 jastaǵy jas basshy memlekettik qyzmettegi eńbek jolyn Qyzylorda qalasynyń ishki saıasat bóliminen bastaǵan. Keıin mınıstrlikter men ulttyq kompanıalarda turǵyn úı-kommýnaldyq jáne ınvestısıalyq baǵyttarda qyzmet etken. 2017 jyldan bastap túrli basqarý qurylymdarynda jetekshilik qyzmetter atqaryp, 2023 jyly Túrkistan qalasynyń ákimi bolyp taǵaıyndaldy.
Ápkeli-inili Taý áýleti
Nurgúl Taý — Qazaqstan Respýblıkasy Parlamenti Májilisiniń depýtaty. Eńbek jolyn 2000 jyly Almatyda kadr bóliminiń ınspektory retinde bastaǵan. Keıin bilim basqarmasynda rýhanı-adamgershilik tárbıe men ózin-ózi taný baǵytynda jetekshilik etti. 2022–2023 jyldary Almaty qalasy bilim basqarmasynyń tárbıeleý jáne mektepke deıingi bilim bólimin basqarǵan. Depýtat retinde el ıgili men ult bolashaǵy úshin mańyzdy zań jobalardy qabyldaýǵa at salysqan, belsendi tulǵa.
Al inisi Nurymbek Taý Almaty qalasy máslıhatynyń depýtaty. Ol 2008 jyly «Daco Motors KZ» kompanıasyn qurǵan. Búginde kompanıa halyqaralyq shınalar brendi Yokohama, Triangle, Achilles jáne Nankang ónimderiniń resmı dıstrıbútory bolyp sanalady.
Aǵaıyndy Halyqovtar
Aǵaıyndy Halyqovtar Qazaqstannyń áskerı qurylymynda uzaq jyl qyzmet etti.
Marqum Damır Qasymbekuly general-maıor shenindegi tájirıbeli áskerı basshy edi. Ol qyzmet jolyn Aýǵanstandaǵy Orta Azıa áskerı okrýginiń quramynda bastap, keıin Germanıa men Soltústik Kavkazdaǵy bólimderinde eńbek etti. Qazaqstan táýelsizdigin alǵannan keıin eldiń Qarýly kúshterin qalyptastyrý kezeńinde jetekshilik mindetter atqardy. 1999–2002 jyldary Qorǵanys mınıstriniń orynbasary boldy, keıin Ońtústik áskerı okrýgtiń qolbasshysy qyzmetin atqardy. Keıingi jyldary Almaty qalalyq tótenshe jaǵdaılar departamentin basqardy. Alaıda sheneýnik byltyr 4 aqpanda kóz jumdy.
Al general-leıtenant Ámir Qasymbekuly Halyqov qazirgi tańda Qazaqstan Respýblıkasynyń Qorǵanys mınıstrliginiń Bas áskerı ınspeksıasyn basqarady. Áskerı mansabyn Germanıada bastap, keıin otandyq áskerliń túrli qurylymynda jetekshilik etti. Ol tank batalóny men motostrelok dıvızıasyn basqardy, sondaı-aq aımaqtyq qolbasshylyqta mańyzdy strategıalyq sheshimder qabyldaǵan. 2009–2013 jyldary Batys óńirlik qolbasshylyǵyn, al 2015–2017 jyldary Bas shtab bastyǵynyń birinshi orynbasary qyzmetin atqardy.
Aǵaıyndy Atamqulovtar
Aǵaıyndy Atamqulovtar eldiń syrtqy saıasat salasynda jáne memlekettik basqarý qurylymynda joǵary laýazymdy qyzmetter atqaryp keledi. Qos sheneýniktiń mansap jolyna úńilsek, kásibı baǵyttary bir-birine uqsas órbigenin baıqaýǵa bolady.
Beıbit Bakıuly Atamqulov — memleket jáne qoǵam qaıratkeri, dıplomatıa jáne ekonomıkalyq basqarý salasynda mol tájirıbesi bar tulǵa. Ol eńbek jolyn ınjener retinde bastap, keıin ákimdik jáne mınıstrlik deńgeıine deıin ósti. Ár jyldary Ońtústik Qazaqstan oblysynyń ákimi, qorǵanys jáne aeroǵarysh ónerkásibi mınıstri, syrtqy ister mınıstri, ındýstrıa jáne ınfraqurylymdyq damý mınıstri qyzmetterin atqardy. 2025 jyldyń 6 qarashasyna deıin Qazaqstan Respýblıkasynyń Ózbekstandaǵy tótenshe jáne ókiletti elshisi bolyp qyzmet etti.
Al onyń baýyry Mádı Atamqulov Qazaqstan Respýblıkasynyń Serbıadaǵy tótenshe jáne ókiletti elshisi bolyp jumys isteıdi. Buǵan deıin ol Memlekettik hattamalyq qyzmettiń jáne Prezıdent protokolynyń basshysy qyzmetin atqarǵan.
Aǵaıyndy Baıedilovter
Qanat Eskendiruly Baıedilov 2021 jyldan beri Almaty qalasy boıynsha Memlekettik kirister departamentiniń basshysy qyzmetin atqarady. Eńbek jolyn 1991 jyly qarjy jáne baqylaý organdarynda bastaǵan. Keıin Qarjy baqylaý komıtetinde bólim basshysy jáne basqarma orynbasary bolǵan. 1999–2008 jyldary Almaty qalasynyń Túrksib jáne Medeý aýdandarynyń salyq komıtetterin basqaryp, qalalyq salyq komıtetiniń tóraǵasy qyzmetin atqardy. 2017–2021 jyldary Qarjy vıse-mınıstri boldy.
Onyń baýyry Talǵat Baıedilov qazirgi ýaqytta Almaty oblysy Eńbekshiqazaq aýdanynyń ákimi bolyp jumys isteıdi. 2024 jyldyń naýryzyna deıin Almaty oblystyq máslıhatynyń tóraǵasy qyzmetin atqarǵan. Eńbek joly 1999–2002 jyldary «Qazaqstan Temir Joly» RMK qarjy-ekonomıkalyq ortalyǵynda esepshi jáne ekonomıs qyzmetterinen bastalǵan. 2002–2005 jyldary «ICS» JSHS ınspektory boldy, 2006–2008 jyldary İle aýdandyq poshta baılanysy torabynyń bastyǵy qyzmetin atqardy. 2008–2018 jyldary Raıymbek aýdanynda túrli basshylyq laýazymdarda eńbek etti. Sondaı-aq Almaty oblysy Kegen aýdanynyń ákimi qyzmetin atqardy.
Al Qonysbek Eskendiruly Baıedilov Almaty oblysy boıynsha Ekologıa departamentin basqardy. Onyń tabıǵı resýrstardy basqarý jáne qorshaǵan ortany qorǵaý salasynda uzaq jyldyq tájirıbesi bar.
Aǵaıyndy Serikbaıuly
Qazaqstandaǵy jas býyn sheneýnikterdiń qataryn aǵaıyndy Oljas jáne Tilektes Serikbaıuly tolyqtyrady. Bir úıden shyqqan eki baýyrdyń da kásibı joly uqsas.
Oljas Sýleımenov Atyraý munaı jáne gaz ýnıversıtetiniń jastar men áleýmettik máseleler jónindegi prorektory qyzmetin atqarǵan. Ol «Bolashaq» baǵdarlamasynyń túlegi jáne Qytaıda 9 jyl oqyǵan. 2009 jyly Sıan qalasyndaǵy Soltústik-Batys ýnıversıtetin «Qytaı tili men mádenıeti» mamandyǵy boıynsha támamdaǵan. 2015 jyly Shanhaıdaǵy Tongjı ýnıversıtetin ınjener-qurylysshy mamandyǵy boıynsha bitirgen. Ol halyqaralyq tájirıbesin Drexler & Partner Construction Group, PMJ Asia Construction Group sıaqty kompanıalarda jınaqtaǵan. Keıin CentrAsia Group kompanıasynyń óndiris jónindegi dırektory qyzmetin atqarǵan. 2018 jyldan bastap ol Qazaqstandaǵy bilim jáne ǵylym salasynda jumys isteı bastady. Sonymen qatar, Oljas Súleımenov eks-prezıdent Nursultan Nazarbaevtyń halyqaralyq minberlerdegi jeke aýdarmashysy qyzmetin atqarǵan. 2018 jyly din isteri jáne azamattyq qoǵam mınıstri Nurlan Ermekbaevtyń jastar saıasaty máseleleri boıynsha shtattan tys keńesshisi boldy.
Al onyń aǵasy Tilektes Serikbaıuly Adambekov - Qazaqstan Respýblıkasy Parlamenti Májilisiniń depýtaty. Ol da «Bolashaq» baǵdarlamasynyń túlegi jáne shetelde bilim alǵan. Áýeli Shanhaıda, keıin Nazarbaev Ýnıversıtetinde bilimin jetildirgen. Parlamentke deıin Tilektes Adambekov «Astana Innovations» AQ-da ınvestısıalar jónindegi basqarýshy dırektor, «Astana Invest» JSHS bas dırektor orynbasary, qalalyq ınvestısıalyq damý ortalyǵynyń tóraǵasynyń keńesshisi sıaqty jaýapty laýazymdarda eńbek etken.
Al olardyń ákesi Serikbaı Adambekov 35 jyl boıy ishki ister organdarynda qyzmet etken.
