Qazaqstannyń qazirgi biligi «Eski Qazaqstannyń» aktivteri men zańsyz shyǵarylǵan qarjy resýrstaryn elge qaitarýǵa baǵyttalǵan jumysty jalǵastyryp jatyr. Onyń ishinde, 2023 jyly eks prezident Nursultan Nazarbaevtyń marqum inisi Bolat Nazarbaevtyń birqatar múlki memleket menshigine qaitarylǵan, - dep habarlaidy Dalanews.kz «Nýrsýltanskii solovei» telegram arnasyna siltep.
Mysaly Almaty oblysynyń Jer resýrstaryn basqarý departamenti sotqa Bolat Nazarbaevtyń uly – Nurbol Nazarbaevqa tiesili Almaty qalasynyń irgesindegi biik taýly jailaý - Úshqońyrdaǵy 9 myń gektar jerdi qaitaryp alý týraly aryzdanǵan. Ile-Alataý ulttyq parkimen shekaralas turǵan Úshqońyr Nazarbaevtar áýleti týǵan Shamalǵanǵa jaqyn ornalasqan.
Úshqońyr Nazarbaevtar áýletine 90-jyldary ótip ketkeni týraly kópten belgili. Alaida Nazarbaev bilikten ketkennen keiin «Jańa Qazaqstan» biligi Nazarbaev bilik etken jyldary onyń týystary satyp alǵan jer telimderin, kásiporyndar men jyljymaityn múlikti qosa alǵanda, zańsyz alynǵan barlyq múlikti qaitarý boiynsha jumystardy bastap ketken.
Qazirgi ýaqytta Úshqońyr ústirti resmi túrde Nurbol Nazarbaevqa tiesili.
Buǵan deiin memleket Úshqońyr úshin Bolat Nazarbaevtyń ulymen sottasyp jatyr degen derek shyqqan bolatyn. Osy máselege premer-ministrdiń orynbasary Serik Jumanǵarin de jaýap bergen edi. Ol Úshqońyrda 15 myń gektar jerdi qarýly kúzet qorshap alǵany týraly depýtattardyń úndeýine pikir bildirdi.
Daý Májilis depýtaty, jýrnalist Maqsat Tolyqbai Almaty oblysy Shamalǵan aýylyndaǵy Úshqońyr taýy qorshalyp turǵan jerge kire almaǵanynan bastaldy. Áleýmettik jelilerde aýmaq qorshalǵan video da tarap ketti. Tolyqbaidyń sózinshe, memlekettiń 15 myń gektar jerin qarý asynǵan kúzetshiler qorshap alǵan.
