Túrkistan oblysynda balalardy jazǵy demalys ýaqytynda saýyqtyrý sharalaryn tiimdi uiymdastyrý maqsatynda jalpy 32 maýsymdyq demalys lagerleri qyzmet kórsetedi. Onyń ishinde 11-i memlekettik bolsa, 21-i jekemenshik. Oblys ákiminiń orynbasary Beisenbai Tájibaev daiyndyq jumystaryn pysyqtaý maqsatynda májilis ótkizdi, - dep habarlaidy Dalanews.kz.
Jiynǵa oblystyq Bilim basqarmasy, óńirlik sanitariialyq-epidemiologiialyq baqylaý departamenti, jaýapty aýdan, qala ákimderiniń orynbasarlary, bilim bóliminiń basshylary, lagerlerdiń jetekshileri onlain-oflain formatta qatysty.
"Oqýshylardy qabyldaý, nysandardyń infraqurylymy men materialdyq-tehnikalyq bazasyn retteý, qyzmet kórsetýdi uiymdastyrý máselelerin talqylaýǵa jinalyp otyrmyz. Bul isterge qańtar aiynan bastap kiristik. Lagerlerdi aralap kórdim. Áli de jumys baiaý. Ýaqyt tyǵyz. Jazǵa deiin saqadai sai bolýymyz kerek. Balalardyń qaýipsizdigine asa mán berińizder. Ǵimarattardy jóndeý jumystary boiynsha monitoringti toqtatpańyzdar. Ásirese jekemenshik lagerlerdi zerdeleý qajet. Az qamtylǵan jáne kópbalaly otbasylardyń balalaryna basymdyq berilýge tiis. Bul baǵyt oblys ákimi Nuralhan Kósherovtiń baqylaýynda. Jumysty kúsheitińizder", - dedi Beisenbai Dáýletuly.
Bilim basqarmasy basshysynyń orynbasary Aigúl Qasymbekovanyń málimdeýinshe, biyl birshama ózgerister bar. 2025 jyly balalardy saýyqtyrý jumystarynyń basym bóligin memlekettik lagerler men oblystyq bilim basqarmasyna qarasty 2 mekemede ótkizý josparlanyp otyr. Qosymsha modýldik jatyn oryndaryn qoiyp, balalardyń sanyn arttyrý kózdelip otyr. Osy jyly oblystaǵy jazǵy saýyqtyrý lagerlerinde 40 myńnan astam bala tynyǵady. Al lageri joq aýdandardyń máselesin sheshý joldary qarastyrylýda.
Ár maýsymnyń ashylýy aldynda qaýipsiz aýyz sý júieleriniń bolýy, tamaqtaný jáne turý jaǵdaiynyń qamtylýy, zalalsyzdandyrý, meditsinalyq kómekterdi úilestirý, úi-jaǵdailardyń jáne aýmaqtyń zalalsyzdandyrylýy, sý men topyraqty zertteý syndy sharalary júrgiziledi. Sanitariialyq-epidemiologiialyq baqylaý departamenti basshysynyń orynbasary Asqar Bekbolatuly arnaiy jol karta aiasynda jumystar jalǵasatynyn jetkizdi.
