Halyqty jumyspen jáne baspanamen qamtý, áleýmettik qorǵaý máseleleri búgin qala ákiminiń orynbasary Erǵali Bilisbekovtiń azamattardy onlain qabyldaýynda qaraldy.
Jalpy jumyspen qamtý ortalyǵy jumys berýshiler tarapynan suranysqa sai usynylatyn jumys oryndaryna joldaidy. Qabyldaýda bolǵan turǵyndardyń keibiri ózderi qalaǵan jumys túrleri tabylmai jatatyndyǵyn jetkizdi. Bul oraida jańadan qurylǵaly otyrǵan jumys oryndary jumyssyzdyq deńgeiin tómendetýge septigin tigizbek.
Odan bólek, Memleket basshysynyń tapsyrmasyna sáikes bul jyly 18 myńnan asa jasty jumyspen qamtý sharalaryna tartý josparlanýda.
Qabyldaý barysynda baspanaǵa muqtaj azamattar da ótinishterin jetkizdi. Azamattardyń biri ýaqytsha baspana surasa, endi biri kezeginiń kelmegenine narazy.
Qala ákiminiń orynbasary búginde turǵyn úi kezegine 48 myńnan astam azamat tirkelgenin, memlekettik turǵyn úi qorynda ýaqytsha baspana qarastyrylmaǵanyn, Qazaqstan Respýblikasy «Turǵyn úi qatynastary týraly» Zańyna sáikes memlekettik turǵyn úi qorynan turǵyn úi belgilengen tártippen kezek arqyly beriletinin jetkizdi.
Arendalyq turǵyn úiler kópbalaly otbasylarǵa, halyqtyń áleýmettik jaǵynan álsiz toptaryna jáne jumys isteitin jastarǵa beriledi. Al, biýdjettik uiym qyzmetkerlerine «Nurly jer» memlekettik turǵyn úi baǵdarlamasy aiasynda jeńildetilgen nesielik baǵdarlamalary usynylýda.
Kezekte tirkelgen azamattardyń barlyǵy jeńildetilgen ipotekalyq baǵdarlamalar boiynsha baspanaly bola alady. Qabyldaý barysynda ár turǵynnyń máselesi nazarǵa alynyp, tiisti basqarma basshylaryna birqatar tapsyrmalar berildi. Qala basshysynyń orynbasary óz tarapynan ár azamattyń ótinishin jiti baqylaýyna alǵan.
